Намрын чуулганы ээлжит хуралдаан өнөөдөр /2022.10.14/ 10 цагт эхэллээ. Чуулганы хуралдаанаар төлбөрийн чадваргүйдлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэж байна. Энэ үеэр УИХ-ын гишүүн Г.Амартүвшин тус хуулийн төслийг дэмжиж байгаагаа илэрхийлж, өөрийн үзэл бодлоо хэллээ.
УИХ-ын гишүүн Г.Амартүвшин “Шинээр орж ирж байгаа дампуурлын тухай хуулийг дэмжиж байна. Одоо үйлчилж байгаа хуулиар бол компаниуд төлбөрийн чадваргүй болох юм бол шууд тэр компанийг татан буулгадаг. Америкийн дампуурлын хууль бол төгс дампуурлын хууль гэж яригддаг. Яагаад гэвэл тэр хуулиар нэг бол компани өөрөө дампуурлаа зарлаад дахин бүтцийн өөрчлөлт хийж компаниа амилуулах боломжтой байдаг. Бидний мэдэх том компаниуд хүртэл дампуурч байсан түүхтэй. Одоо бол хэдэн тэрбумын үнэлгээтэй. Өөрөөр хэлбэл энэ дампуурлын хуулиар компаниуд дахин бизнесээ амилуулах боломж нь гарч байгаа нь бол маш хэрэгтэй юм. Мэдээж бизнес болгон эрсдэлтэй байдаг. Эдийн засаг, буруу шийдвэр, гадны нөлөө зэргээс болоод компанийн үйл ажиллагаа нь доголддог. Өмнө нь бизнес орчин сайн байхад авсан зээлийнхээ үлдэгдлээ дийлэхгүй, даахгүй хэмжээнд хүрсэн компаниудад хэцүү байгаа үед нь боломж олгох гарц байгаа нь маш зөв. Тиймээс энэ хуулийг дэмжиж байгаа. Харин ажлын хэсэг дээр маш сайн ажиллах хэрэгтэй. Ялангуяа нэхэмжлэлийн шаардлага хангах дараалал дээр сайн анхаарах хэрэгтэй” хэмээн хэллээ.
Г.Бүжинлхам
