2023 оны төсвийн төслүүдтэй хамт Хүүхдийн мөнгөн тэтгэмжийн талаар авах зарим арга хэмжээнд өөрчлөлт оруулах тогтоолын төслийг өргөн мэдүүлсэн. Тодруулбал, Хүүхдийн мөнгөн тэтгэмж олгох үйл ажиллагааг өрхийн амьжиргааны түвшинг нарийвчлан тооцохдоо өрхийн мэдээллийн нэгдсэн сан болон төрийн мэдээллийн бусад санг ашиглан бүрдүүлэх, хүүхдийн мөнгөн хуримтлал болон бусад хэлбэрээр хадгалах, хөрөнгө оруулалт хийх боломжийг олгох, хүүхдийн мөнгөн тэтгэмжийг согтууруулах ундаа, тамхины хэрэглээнд зарцуулахыг хориглох байдлаар тусгажээ.
Хүүхдийн ирээдүйн өв санд зориулан сар бүр олгож буй зуун мянган төгрөгийг эцэг, эхчүүд архи, тамхинд зарцуулж байгааг хуулиар хориглохоор оруулж иржээ. Үүний шийдэл нь архи, тамхины худалдаанд ашиглах боломжгүй тусгай картаар хүүхдийн мөнгийг олгох гэв.
Ингэж зохицуулалт хийвэл хүүхдийн мөнгө жинхэнэ эзэндээ бүрэн очиж, эцэг эх нь архи, тамхинд зарцуулдаг байдлыг бүрэн хянах боломжтой эсэхэд талуудын байр суурийг хүргэж байна.
ЗГХЭГ-ын дарга Д.Амарбаясгалан: И баримтын системтэй хамтраад хүүхдийн мөнгийг картаар олгох системд нэвтрүүлнэ
"Хүүхдийн мөнгийг картаар олгохоор болсон. Тухайн карт нь архи, тамхины худалдаанд ашиглагддаггүй байх зохицуулалтыг татварын систем дээр бий болгосон. И баримтын системтэй хамтраад богино хугацаанд хүүхдийн мөнгийг картаар олгох системд нэвтрүүлнэ.
Хүүхдийн мөнгийг халамжид оруулсан учраас хүүхдэд зориулагдсан хоол хүнс, тэжээлийн бүтээгдэхүүнд л тухайн картаар үйлчилдэг байх системийг ойрын хугацаанд оруулах боломжтой гэж үзэж байгаа. Цаашилбал, зөвхөн үндэсний үйлдвэрлэгчдийг дэмжиж, бараа бүтээгдэхүүнээр хангадаг байхаар зохицуулалт хийнэ.
ХНХ-ын дэд сайд Д.Зулпхар: Хүнсний эрхийн бичгээр 10 нэр төрлийн бараа авч болдог шиг зохицуулалтыг хийнэ
"Үүнийг хийхэд тодорхой хугацаа, зохион байгуулалт шаардана. Төрийн болон банк санхүүгийн байгууллагын хамтын ажиллагаа шаардлагатай.
Хүнсний эрхийн бичгийг өнгөрсөн хоёр жилийн дотор журам, шалгуурыг өөрчилж, картаар олгодог болсноор хязгаарлалтуудыг картанд тавьсан. Картын хязгаарлалт бол хүнсний эрхийн бичгээр авдаг 10 нэр төрлийн бараанаас өөр бараа бүтээгдэхүүн авч болохооргүй болсон. Үүнтэй адилаар хийх боломжтой гэж харж байгаа.
Сангийн яам: Хүүхдийн мөнгийг олгох тусгай картын хэрэглээг хянах бүрэн боломжтой
Өнөөдрийн байдлаар хүүхдийн мөнгөний 33 хувь нь хадгаламж хэлбэрээр байршиж байгаа. Зарим хувь нь эцэг эхийн архи тамхи зохистой бус хэрэглээнд зарцуулж байна гэсэн судалгаа бий. Тиймээс хүүхдийн мөнгийг зохистой хэрэглээнд хандуулах зохицуулалт хийнэ. Хүүхдийн мөнгөөр дамжуулан эцэг эхийнх нь архи, тамхины мөнгө болж очиж буй гэх мэт зохисгүй хэрэглээг хязгаарлах юм. Үүний шийдэл нь дэлгүүрээс архи, тамхины худалдан авалтыг уншихгүй байх тусгай картаар хүүхдийн мөнгийг олгох юм. Үүнийг хянах бүрэн боломжтой.
УИХ-ын гишүүн М.Оюунчимэг: , гэвэл манай улс хянаж чадахгүй
Хүүхдийн мөнгийг архи, тамхины хэрэглээнд зарцуулахыг хориглоно гэвэл манай улс хянаж чадахгүй,. Гадны улсад хүүхдийн хэрэгцээг хангах зүйлсэд ваучер өгдөг. Энэ мэтээр зохицуулалтыг хийж болно. Гэхдээ бид дагаж яваад хяналт тавих ямар ч боломжгүй.