Улсын ерөнхий прокуророос нэр холбогдсон хүмүүсийг шалгаж эхэлсэн байдаг.Б.Баасанцогтыг 2022 оны дөрөвдүгээр сарын 4-ний өдрөөс нэг сарын хугацаанд цагдан хорих шийдвэр гаргасан ч Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхийн ерөнхий шүүгчид гомдол гаргасныг хянан хэлэлцээд, тавдугаар сарын 13-ны өдөр батлан даалтад гаргаад байсан юм. Зургадугаар сард түүний шүүх хуралдаан хойшилсон бол наймдугаар сард батлан даалтыг хүчингүй болгож, цагдан хорьсон. Томоохон улстөрчидтэй нэр холбогдсон өмгөөлөгч асан Б.Баасанцогт болон шүүгч асан Б.Мөнхбаяр, Д.Энхцэцэг, “Номин холдинг” ХХК-ийн салбар компанийн төлөөлөгч И.Галбуянд холбогдох хэргийн шүүх хурал Хан-Уул дүүргийн Эрүүгийн хэргийн анхан шатны шүүхэд энэ сард товлогдоод байсан юм. Хэргийг 10 дугаар сарын 11-ний өдрөөс хаалттай хэлэлцэж, Б.Баасанцогтод хорих ял оноогоод байна. Нийслэлийн Прокурорын газраас Хан-Уул дүүргийн Иргэний хэргийн анхан шатны шүүхийн шүүгч асан Б.Мөнхбаярыг Эрүүгийн хуулийн 22.1-1-т заасан албан тушаалаа урвуулсан, шүүгч асан Д.Энхцэцэгийг мөн хуулийн 22.4-2 дахь хэсгийн “Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд, бусдаар дамжуулан хахууль авсан”, өмгөөлөгч асан Б.Баасанцогтыг 22.5-1-ийн бусдад хахууль өгсөн, 12.6-2 дахь хэсгийн биеэ үнэлэхийг зохион байгуулсан хэмээн яллах дүгнэлт бичиж шүүхэд шилжүүлээд байсан. “Номин холдинг”-ийн хамаарал бүхий “Улаанбаатар импэкс” компанийн төлөөлөгч И.Галбуянг Эрүүгийн хуулийн 22.5-3 дахь хэсгийн “Өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгөх гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн” гэж яллагдагчаар тооцсон байдаг. Шүүхээс Б.Баасанцогт, Б.Мөнхбаяр, Д.Энхцэцэг нарыг хахууль өгч, авсан, албан тушаалаа урвуулсан гэмт хэрэг үйлдсэн гэм буруутайд тооцсон байна. Ингээд Б.Баасанцогтод дөрвөн жил дөрвөн сар хорих, шүүгч асан Б.Мөнхбаяр, Д.Энхцэцэг нарыг 7.5 сая төгрөгөөр торгох ял оноожээ. “Номин холдинг” ХХК-ийн салбар компанийн төлөөлөгч И.Галбуян цагаатгасан байна.
