УИХ-ын чуулганы нэгдсэн хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдлийг хэлэлцэж байна. Хуралдааны үеэр УИХ-ын гишүүн М.Оюунчимэг нийгмийн даатгалын тонтолцоотой холбоотой асуудлаар асуулт асуулаа. Тэрбээр “Хүүхдийн мөнгийг архи тамхинд үрдэг эрсдлийг хянана гээд байгаа. Энийг ямар зохицуулалтаар хянах вэ? хэмээн асуулаа.
ХНХ-ийн дэд сайд С.Зулпхар: Хүүхдийн мөнгөн тэтгэмжийг олгож эхэлсэнтэй холбоотойгоор тэр мөнгийг буруу зүйлд зарцуулах чиглэлээр ямар зохицуулалттай хязгаарлалт хийж чадах юм бэ гэсэн асуулт байна. Бидэнд урьдны туршлага байгаа. Хүнсний эрхийн бичгийг бид 2 жилийн дотор нэгдүгээрт журмыг нь өөрчлөөд, хоёрдугаарт шалгаруулалтыг нь өөрчлөөд, гуравдугаарт картаар олгодог болгоод картан дээр нь хязгаарлалтууд тавьж өгсөн. Хүнсний эрхийн бичгээр авдаг 10 нэр төрлийн бараа бүтээгдэхүүн байдаг. Тэрнээс өөр бараа бүтээгдэхүүн авч болохооргүй хязгаарласан. Яг үүнтэй нэгэн адилаар энэ зохицуулалтыг хийх боломж байгаа гэж үзэж байгаа. Гэхдээ тодорхой хугацаа шаардана” гэж хариулав.
Хариултаа авсны дараа УИХ-ын гишүүн М.Оюунчимэг ХНХ-ийн дэд сайдыг “Манай энэ ХНХ-ийн дэд сайд бөөрөнхийллийн мастер шүү” хэмээн хэлжээ.
Г.Бүжинлхам
