Чуулганы нэгдсэн хуралдаан өнөөдөр 10.00 цагаас эхэллээ. Хуралдаанаар Монгол Улсын 2023 оны төсвийн тухай, Нийгмийн даатгалын сангийн 2023 оны төсвийн тухай, Эрүүл мэндийн даатгалын сангийн 2023 оны төсвийн тухай хуулийн төслийг үргэлжлүүлэн хэлэлцэж байна.
Хуралдааны үеэр гишүүд өөрсдийн эрх, үүргийн хүрээнд үг хэлж байна.
УИХ-ын гишүүн Н.Алтанхуяг “УИХ-аар хэлэлцэж байгаа асуудалтай холбогдуулаад дөрөвдүгээр сард нэг тогтоолын төсөл өргөн барьсан юм. Тэгээд тэр тогтоолын төсөл УИХ-аар хэлэлцэгдээгүй. Тогтоолын гол санаа нь байгалийн баялагтаа эзэн болъё гэсэн уриатай байсан юм. Эрдэнэт үйлдвэр дээр цөөхөн хүн нь баялаг эзэмшдэг биш нийт ард иргэдэд тодорхой хэмжээгээр хувь хүртээх боломж нээгдэх болно гэж бодож санаачилсан. Гэтэл одоо би сонин зүйл харж байна. УИХ-ын гишүүн хууль санаачлахад маш хэцүү болсон юм байна. Би 4 сард өргөн барьсан, 6 сарын 8-нд байнгын хороо хуралдаад бичиг явуулсан байх юм. Энийг би өчигдөр л олж авлаа. Ядаж надад бичгээ өгөх хэрэгтэй. УИХ-ын гишүүн хууль санаачилчхаад байхад түүнийг нь байнгын хороо авч үзээд гишүүдийн олонх нь МУ-ын үндсэн хууль бусад хууль тогтоомжид нийцэж байгаа талаар хууль зүйн дүгнэлт гаргуулах нь зүйтэй гэсэн байна. УИХ-ын хэн ч хууль санаачлахад тамгын газар дээр хянагддаг болох нь. УИХ-ын гишүүн, Ерөнхийлөгч, Хууль санаачлагчийн эрхэнд хэн ч халдаж болохгүй. Энэ хуулийн амин чухал санаа нь Эрдэнэтийн хаягдал гэсэн нэрээр баялгийг завшиж байгаа цөөхөн хүн байгаа. Та нар тэгээд тэр цөөхөн хүний эрх ашгийг хамгаалах юм уу, ард түмний эрх ашгийг хамгаалах юм уу. Гурван хүний иддэг мөнгийг 100 мянгуулаа ч гэсэн хүртэж болдоггүй юм уу ” хэмээн хэллээ.
Г.Бүжинлхам
