УИХ-ын чуулганы хуралдаан үргэлжилж байна. Энэ үеэр Н.Алтанхуяг гишүүн Монголын эдийн засаг, мөнгөний бодлоготой холбоотой өөрийн байр суурь үзэл бодлоо илэрхийллээ.
Тэрбээр “Та нарын яриад байгаа бодлого биш байна. Энэнээс болоод эдийн засаг явахгүй байна. Мэдээж хүндрэл бэрхшээл байгаа. Дэлхий даяраа байгаа. Энэ хүндрэлтэй тэмцэнэ гэж л Их хурал, Засаг, Монголбанк байдаг байлгүй дээ. Одоо энэ ярьж байгаа юм нь Хятад буруутай, Орос буруутай л гэж байна. Хятад тээвэр гацаасан, Орос валютаар бензин зараад байгаа гээд л байх юм. Тэгээд ийм байж яаж ард түмний амьдралыг, улс орны хөгжилийг ярих юм бэ. Төсвийнхөө бодлогыг уялдуулаачээ. Одоо үүний дараа Сангийн сайд нь орж ирээд төсөв ярьж эхлэнэ. Гэтэл энэ 2 хоорондоо уялдахгүй. Ингэж болохгүй. Нэг улс шүү дээ. Энэ төсвийн үр ашиггүй хөрөнгө оруулалтаа зогсоо гэж зөндөө хэллээ. Бодлого зөв байх ёстой. Юмны үнийн өсөлтийг та нар зогсоож чадахгүй юм байна. Ардын нам дотроо бодлогоо зохицуулж, улс орон ард түмнээ гэсэн сэтгэлтэй юм хийхгүй бол энэ улс дампуурлаа шүү дээ.
Хахуул гэдэг зүйл бүх салбарт хэрээс хэтэрлээ. Тэгээл гоё гоё юм их ярих юм. Хэчнээн жил хүлээж байна аа. Барилгын материал хүртэл 600 сая доллараар худалдаж авч байна. Хэрэгтэй хэрэггүй барилга битгий бариачээ. Ялангуяа төсвийн мөнгөөр. Дотоодынхоо үйлдвэрүүдтэй ярьж хэлэлцэж болно шүү дээ. Хоорондоо хэрэлдчихээд цементээ гаднаас авчихдаг болчих юм яаж байгаа юм бэ. Бодлогоо нэгтгэхгүй юм. Энэ нэг улс юмуу, хэлэн улс вэ. Хаа байна та нарын хүчээ нэгтгээд Монгол улсыг хөгжүүлнэ гээд яриад байсан. Бодлогоо гаргаад ард иргэддээ үнэнээ хэлээч” гэж нийт гишүүддээ хандан хэллээ.
Г.Бүжинлхам