УИХ-ын чуулганы хуралдаан үргэлжилж байна. Хуралдааны үеэр УИХ-ын гишүүн Г.Амартүвшин “Ковидын үеийн хоёр жилийн хугацаанд ЗГ-ын хэрэгжүүсэн арга хэмжээний хүрээнд их хэмжээний бэлэн мөнгө тараасан. Энэ арга хэмжээний үр дагавар ханшны сулрал. Монголбанк бодлогын хүүгээ нэмсэн, гэхдээ үүнийг цаг алдсан арга хэмжээ гэж харж байна. Дараагийн асуудал бол төлбөрийн тэнцэл. Хүнсний бүтээгдэхүүнд импортоор 600 гаруй сая доллар, суудлын автомашинд 400 сая доллар, барилгын материалын худалдан авалтад 600 сая доллар, 450 сая доллараар гадаадад аяласан байна. Тэгэхээр ийм их хэмжээний доллар гарч байгаа тохиолдолд Монголбанкны гадаад валютын нөөц буурахаас өөр арга байхгүй. Төгрөгийн шинэ дэвсгэрт гаргана гэж бичсэн байна лээ. Энэ тохиолдолд төгрөгийн ханшийн сулрана гэж харж байна. Цаашид далд эдийн засгийг дэмжих арга хэмжээ болж эргэх юм биш биз” хэмээн хэллээ.
Үүнд Монголбанкны Ерөнхийлөгч Б.Лхагвасүрэн “Бодлогын хүү 2 дахин өссөн. Хүүг цааш нь өсгөх нь маш олон зүйлсээс хамаарна. Эдийн засгийн идэвхжил болон инфляц, ханш зэргээс хамаарна. Төлбөрийн тэнцэлийн алдагдалаа яаж багасгах вэ гэхээр төв банк ингэж багасгана гэж хэлэх арга байхгүй. Гадаад худалдаа болон экспорт, импортоор дамжих үйлчилгээ үзүүлж байгаа салбартай холбоотой. Монголбанк шинэ дэвсгэрт гаргах тал дээр судалгаа хийж байна” гэж хариуллаа.
Г.Бүжинлхам
