2016 оны УИХ-ын сонгуулийн ялагдалтай хамт АН-ын дотоод эв нэгдэл ч таран бутарсан. Тэд 2016 оноос хойш “УРДАГ НОХОЙ” шиг нэгнээ матаж явсаар саяхан цуглан “ЭЛЭГ БҮТЭН” уулзацгаав.
Төрийн хэрэгт хяналт тавих АН-ын хүч суларсан учраас одоо л нэгдэх ёстойгоо ухаарсан юм шиг гэнэт цуглан ийн уулзацгаасан нь зарим хүнийг хардахад хүргэж, зарим хүний баярыг хүргэв. Ямар ч байсан МАН-ыг буулгаж авах болон АН-ын нэгтгэл, цаашлаад дараагийн сонгуулиар байр сууриа сэргээх талаар хэлэлцсэн нь тодорхой. Өнгөрсөн 6 жилийн хугацаанд Ц.Элбэгдоржийн тал, Х.Баттулга, З.Энхболд нарын тал, С.Эрдэнийн тамганы маргаан, Ц.Оюунгэрэлийн байгуулсан "Иргэдийн оролцооны нам", Ж.Батзандан, Л.Болд нарын "Шинэ нам" гэхчлэн бутарсаар байгаа. Тэд бутраад ч зогсохгүй үгийн муухайгаар биенээ доромжилоод, гар зөрүүлэх хүртлээ ширүүн харилцаатай байсан.
Өнгөрсөн сонгуулиар байдгаа баран УИХ-д цөөхөн хэдэн суудал авсан ч гишүүд нь МАН-ын хүүхэлдэй болж, одоо бүлэг ч үгүй шахам болчихоод байна.
АН-ыг ингэж тархай бутархай болох төлөвлөгөөг хөшигний цаанаас ЗГХЭГ-ын дарга Д.Амарбаясгалан удирдсан гэдэг “ЯВГАН” яриа бий. Энэ нь ч үнэний ортой. МАН-аас АН-ны зарим гишүүдэд албан тушаал амлаж, дэмжинэ гэсэн амлалт өгч тэднийг өөрсдөдөө урвуулах, намаа бутаргах үйл ажиллагааг зохион байгуулсан байж болох юм. Тухайлбал: Ж.Батзандан, Л.Болд нарын бизнес, албан тушаалыг нь дэмжиж өгөөд, Шинэ нам байгуулах чиг рүү нь хөтөлсөн. С.Эрдэнэ сонгуулиар МАН-ын талд ажиллаж ихэнх тойргоо шаварт хутгасан гэх мэт таамаг дуусахгүй.
Ийн АН-ын хүмүүс МАН-ын хүүхэлдэй шиг хөдөлж өдгөө АН-ыг ийм байдалд хүргээд байгаа. АН тарсан нь МАН-д ашигтайгаар эргэж төрийн эрхийг 8 жилийн турш атгаад байгаа билээ. Парламетад ямар ч сөрөг хүчингүй нэг намын ноёрхол үүсч, улмаар улс орны тогтвортой оршин тогтнох нь МАН-аар овоглосон хэдэн хүмүүсийн мэдэлд очсон. Үүнд иргэд ч мөн санаа чилээж байна.
Улс төрд сөрөг хүчин байж л үнэн бодит шийдвэр гарна. Нэг нам ноёлсон цагт улс орон хөгждөггүй гэдгийг бид эдийн засаг, хөрөнгө мөнгөөрөө яс махандаа шингэтэл мэдэрч байгаа. Тиймээс ч тархай бутархай АН-ыхан эргэн нэгдэж уулзсан нь сайшаалтай.
Одоо чухамдаа МАН-ын ямар бууны нохой АН-ыг бутархай дээр нь буулгаж авах төлөвлөгөө гаргах бол гэдэг нь сонирхол татаж байна.
Г.Бүжинлхам