Монголын Ардчилсан Залуучуудын холбоо өнөөдөр мэдээлэл хийлээ. Тэд ХНХЯ-ны сайд Д.Сарангэрэлийг огцруулаад зогсохгүй ЗГ огцрох ёстой. Ард түмнээ олон жил гишгэж гишгэчихээд ард түмнээсээ уучлал гуйх ёстой гэсэн байр суурьтай байна.
Ардчилсан холбооны тэргүүлэгч Э.Энхзориг: Бид уг нь ардчилсан нийгэмд байгаа гэхдээ бидний харж байгаагаар дарангуйлал тогтсон коммунист нийгэмд амьдарч байна гэж харж байна. Үгээ хэлж, үзэл бодлоо илэрхийлэх хамгийн наад захын эрх зөрчигдөж байна. Эрх баригч нам бол хүний эрхийг хамгийн бүдүүлгээр зөрчиж байна. Өчигдөр гарсан давхар дээлтэй сайд Сарангэрэлийн хувьд Монголын нийгэм хариуцлага тооцдог тогтолцоо руу шилжих ёстой. Иргэд өөрсдийнхөө төлөө жагсаж чаддаг, хариуцлага тооцсоноор төр ажлаа иргэдийнхээ төлөө хийдэг байх ёстой.
Японд гүүр нурахад тэр мужийнх нь захирагч өөрөө уучлалт гуйгаад албан тушаалаа бүрэн бүрэлдэхүүнээрээ өгдөг юм. Монголд ёс зүй хариуцлага тооцдог тогтолцоо байхгүй. Нам гэдэг тогтолцоон дор хаацайлж өнгөрч байна. Ундармаа гэж гишүүн байна. 300 гаруй тэрбумыг авчаад 40 саяар торгуулаад өнгөрснийг бид бүгдээрээ харсан. Ийм нийгмийг хүлээн зөвшөөрөхгүй байна. Сарангэрэл сайдын тухайд ковидын үед 8,5 сая төгрөгөөр хүмүүсийг эмчилсэн. Энэ төсвөө ил гаргах ёстой гэсэн хатуу шаардлагыг тавьж байна. Энэ их мөнгөөр эх орондоо юу хийж болох байсан бэ. Сам, сэнс авч өгөх биш байхгүй юу. Мянга мянган ажлын байрыг дэмжиж болох байсан.
21 тэрбум төгрөгний үнэтэй лаборатори, хээрийн эмнэлгийг авчихаад яагаад улаан цайн мэлзээд өгөхгүй байгаа юм бэ. Гуравдугаарт уучлалаа гуй, тэгээд огцор гэдэг хатуу шаардлага тавьж байна. Эх орныхоо төлөө, монгол улсынхаа ирээдүйн төлөө санаа зовдог хүн болгонд уриалга болгож хэлмээр байна. Миний хувьд ч гэсэн айдас байна. Надад сануулга өгчихсөн байгаа. Хэзээ ачаад явахын гэсэн айдас байна. Би өөрөө охинтой хүн. Би охиноо ийм нийгэмд үлдээмээргүй байна. Бүгдээрээ гэр бүлийнхээ төлөө тэмцэх ёстой. Монгол залуучуудын хүсэл мөрөөдөл бусад хөгжилтэй орны энгийн нэгэн хэрэглээ болсон машин, байр байж хэзээ ч болохгүй. Монгол улс боловсролдоо мөнгө зарцуулдаг болох хэрэгтэй байна. Бидний амьдралын түвшин, үнийн өсөлт ямар байгаа юм. Энэ бүх зүйл дээр бид цавчуулсаар байгаад өрөө төлж лизингдээ баригдаж явсаар байгаад бүгдээрээ сөхрөөд дууслаа. Сүүлийн 6 жил биднийг амьдрах аргагүй болгож байна. Монголын залуучууд бүгд нэгдээд бүгд тэмцье” хэмээн уриаллаа.
Г.Бүжинлхам