Барьцаа хөрөнгийн дутагдалтай Жижиг, дунд үйлдвэр, үйлчилгээ эрхлэгчдийг дэмжих зорилготой байгуулагдсан Зээлийн батлан даалтын санд хулгай нүүрлэжээ. Зээлийн батлан даалтын санд аудитын шалгалт хийхэд 2.5 тэрбум төгрөгийн санхүүгийн зөрчил илэрч, Тус сангийн гүйцэтгэх захирал Ш.Алтанчимэг олон хууль тогтоомжийг ноцтой зөрчсөн болох нь тогтоогдсон байна.
Тодруулбал Зээлийн батлан даалтын сангийн удирдах зөвлөлийн 2020 оны 24-р тогтоолын дагуу 2.1 тэрбум төгрөгийн үнэлгээ бүхий 476.7 метр квадрат оффисын барилгыг Чингисхаан банкнаас авлагад тооцон худалдаж авсан боловч үл хөдлөх хөрөнгийн гэрчилгээ гараагүй. Өөрийн өмчлөлд шилжүүлээгүй байна. Энэ зөрчлөө арилгахыг өнгөрсөн онд даалгаж байсан боловч хэрэгжүүлээгүй. Үүгээр зогсохгүй өөрийн өмчлөлд шилжүүлж аваагүй тус оффисын талбайд их засвар хийхдээ 185.5 сая төгрөгийг хууль зөрчин зарцуулжээ. Зээлийн батлан даалтын сангийн захирал Ш.Алтанчимэг тендер зарлалгүй их засварын ажил хийлгэх гэрээг Бауплан компанитай байгуулж давуу байдал бий болгосон байна. Оффисын засварт зарцуулсан хөрөнгийн хэмжээгээ санхүүгийн тайлан, худалдан авалтын цахим системд тайлагналгүй нууцласан болох нь шалгалтаар тогтоогдожээ. Түүний энэ үйлдэлд АТГ эрүүгийн хэрэг үүсгэж яллагдагчаар татаад байгаа юм.
Төсвийн мөнгөөр туйлсан өөр олон асуудал Ш.Алтанчимэг захирлаар удирдуулсан Зээлийн батлан даалтын сан дээр гарсан. Тухайлбал Худалдаа хөгжлийн банкны хадгаламжийн данснаас 4 тэрбум төгрөгийг Төрийн банк руу шилжүүлж 2021 оны 12 дугаар сарын 10-аас 2022 оны 01-р сарын 20-ны хооронд байршуулжээ. Холбоглох байгууллагын зөшөөрөлгүй шилжүүлсэн уг үйлдлийн улмаас 38.6 сая төгрөгийн хүүгийн орлого дутуу төвлөрсөн байна. Аудитын байгууллагаас уг хохирлыг холбогдох албан тушаалтнаар төлүүлэх шийдвэрийг гаргаад байгаа юм.
Зээлийн батлан даалтын сангийн гүйцэтгэх захирал Ш.Алтанчимэгтэй нэр холбогдох дараагийн хууль бус үйлдэл бол чанаргүй зээлийг батлан дааж улсыг хохироосон явдал. Аудитын байгууллагаас 2020 онд эрсдэлтэй үнэлгээ авсан 800 сая төгрөгийн зээлд 334.5 сая төгрөгийн батлан даалт гаргасан байна алдаагаа зас гэж анхааруулсаар байтал Ш.Алтанчимэг захирал энэ зөрчлийн давтан гаргажээ.
Үүнээс гадна Зээлийн батлан даалтын сан 2021 онд 31.5 сая төгрөгийн төсөвт өртөгтэй 18 ширхэг тоног төхөөрөмж авахаар төсөвтөө тусгасан болов нэр төрөл нь өөр 6 ширхэг тоног төхөөрөмжийг 20.2 сая төгрөгөөр авсан байгаа юм. Өөрөөр хэлбэл төсөвлөсөн хөрөнгийг зориулалтын бусаар зарцуулсан гэсэн үг.
Зээлийн батлан даалтын санд үүрлэсэн хулгайг хуулийн байгууллагууд нарийн шалгаж гүйцэтгэх захирал Ш.Алтанчимэг болон түүний хамсаатнуудаар улсад учруулсан хохирлын нөхөн төлүүлж хуулийн хариуцлага хүлээлгэх ёстой.
Г.Жүгдэр
Эх сурвалж: Toim.mn
