УИХ дахь Ардчилсан намын бүлгээс мэдээлэл хийж байна. Ардчилсан намын бүлгийн өнөөдрийн хуралдаанаар "Төсвийн тухай хууль", "Хэмнэлтийн тухай хууль" зэрэг гурван асуудлыг хэлэлцэв.
Ардчилсан намын бүлгийн дарга Д.Ганбат:
-Нийслэлийн түгжрэлийн асуудлыг шийдвэрлэх зорилго бүхий хөнгөн галт тэрэг буюу LRT гэх энэ том, төсөл хөтөлбөрт хотын иргэдийнхээ саналыг авах хэрэгтэй. Мөн хотын иргэд нь хотын даргаа сонгодог байх нь зөв. Хотын мэр нь зоригтой бодлого хэрэгжүүлдэг, чаддаг хүн байвал ажил явуулахад дөхөмтэй.
МАН зургаан жил засаг барихдаа ойр зуурын гал унтраах, өдөр хоног өнгөрөөх ажил хийж байгааг Монголын ард түмэн бүгд хараад сууж байна. Урьд нь биднийг л дандаа буруутгадаг байсан. Сүүлийн үед ард түмнээ, олон улсын нөхцөл байдлыг буруутгаж байна. Арай ч хоёр хөршөө буруутгахгүй юм шиг байна. Олон сайд хил, гаалиар явлаа, огт үр дүн гарсангүй. Гадагшаа айлчлаач ээ.
ОХУ-д Гадаад хэргийн, ЗТХ-ийн сайд нь айлчлаач. БНХАУ-д Ерөнхий сайд нь айлчилж хэл, амаа ололцооч ээ. Айл хүний амь нэг шүү дээ. Өмнө нь болдог л байсан, сүүлийн хоёр жил асуудал үүсэх болсон нь МАН-тай л холбоотой. Энэтхэг улс ОХУ-аас нефтиэ 65 ам.доллароор авч байна. Зах зээлийн үнээс 35 ам.доллароор бага. Найрсаг хөршдөө айлчилж энэ асуудлыг шийдэх боломж, бололцоо байгаа гэж бид үзэж байна.
УИХ-ын гишүүн С.Одонтуяа:
-Хэмнэлтийн бодлогыг дэмжиж байгаа. Гэхдээ ойр, зуурхан хэдэн хүн халснаар төдийлөн хэмнэлт гарахгүй. Тийм учраас гол хэмнэлтийг төрийн өмчийн компаниудад тавих хэрэгтэй. Төрийн өмчийн компаниудын нийт хөрөнгө 40 их наяд төгрөг. Гэхэд жилдээ 100 хүрэхгүй тэрбум төгрөгийн л орлого оруулж байгаа. Тийм учраас төрийн өмчийн компаниудыг зоригтой хувьчлах асуудлыг тавьж байгаа. Шаардлагагүй төрийн өмчөөс татгалзаж, хувийн хэвшлээ дэмжихэд АН-ын бүлэг голлож ажиллана.
Эдийн засгийн хямралаас гарахын тулд элдэв дүрэм, журмаа багасгаж аж ахуйн нэгжүүдийг дэмжиж байж гарна.
