Улсын ерөнхий прокурорын газраас УИХ-ын нэр бүхий гишүүдийг эгүүлэн татах саналаа удахгүй УИХ-д өргөн барихаар зэхэж буй. Одоогоор зургаан гишүүний нэр яригдаж байна. Үүнд, УИХ-ын гишүүн Х.Ганхуяг, Г.Амартүвшин, Г.Дамдинням, Н.Алтанхуяг нарыг яллагдагчаар татах саналаа хүргүүлсэн. Харин өмнө нь УИХ-ын гишүүн А.Адъяасүрэн, Б.Бейсен нарыг яллагдагчаар татах санал гаргасныг эх сурвалжууд мэдээлж байна.Албаныхны мэдээлснээр дээрх нэр дурдагдсан гишүүдийг түдгэлзүүлэх санал энэ долоо хоногт орж ирэхээр болжээ.
Тодруулбал, өнгөрөгч долоо хоногт АТГ-аас нэр бүхий УИХ-ын гишүүдийг яллагдагчаар татах саналыг прокурорын байгууллагад хүргүүлсэн.Энэ талаар Улсын Ерөнхий прокурорын газраас тодруулахад “АТГ-аас нэр бүхий гишүүдийг яллагдагчаар татах санал ирсэн. Энэ дагуу ажлын гурав хоногт багтаан түдгэлзүүлэх санал оруулах эсэхийг шийдвэрлэнэ” гэлээ.Процессын хувьд Улсын ерөнхий прокуророос нэр бүхий гишүүдийг эгүүлэн татах саналыг УИХ-д өргөн баривал 24 цагийн дотор гишүүд санал хурааж шуурхай шийдвэрлэх ёстой.
