УИХ-ын чуулганы нэгдсэн хуралдаанаар Монгол Улсын 2022 оны төсвийн тухай хуульд өөрчлөлт оруулах тухай хуулийн төслийг хэлэлцэх үеэр гишүүд Засгийн газраас 2022 онд хийх зээлийн эргэн төлөлтийн хэмжээг тодруулахад Сангийн сайд дараах тайлбарыг хийв.
Сангийн сайд Б.Жавхлан “Энэхүү тодотголын хүрээнд Дэлхийн банк, Азийн хөгжлийн банкнаас авах төсвийн тусламж, бусад зээлийн хүрээнд нийтдээ 400 сая ам.доллараар төлбөрийн тэнцэл сайжирна. 2020-2024 оны хооронд Засгийн газрын зүгээс зээлийн эргэн төлөлтийн зохиуцуулалт буюу хамгийн өндөр төлбөр хийх ачаалалтай үе нь байгаа. Засгийн газрын зээлийг доллароор тооцвол 8.5 тэрбум ам.доллар байгаа бөгөөд үүнээс 4.7 тэрбум ам.долларын эргэн төлөлтийг энэхүү дөрвөн жилийн хугацаанд хийнэ. Гэсэн хэдий ч Засгийн газар зээлийн зохицуулалтыг маш амжилттай хийж байна. Энэ жилийн хувьд нийтдээ 1 тэрбум 138 сая ам.долларын зээлийн эргэн төлөлтийг хийх байсан ч бид 1 тэрбум ам.долларыг нь урьдчилан хийж, ачааллыг бууруулж чадсан. Одоо “Чингис” бондоос үлдсэн 138 сая ам.долларын эргэн төлөлтийг төсвөөс хийгээд энэ жилийн өр төлбөрүүд тэглэгдэнэ” гэв.
