Улаанбаатар Дархан чиглэлийн автозамын шинэчлэлийн ажил хийгдэж байгаатай холбогдуулан иргэд нэмэлт тэрэг явуулах хүсэлтийг холбогдох газарт санал тавихыг аймгийн засаг даргад уламжилсан. Тэгвэл өчигдөр УБТЗ-ХНН-ийн ерөнхий инженер Сергей Петрович Старцев болон албаны төлөөлөл Дархан хотод ажиллаж, аймгийн ИТХ-ын дарга С.Насанбат, засаг дарга Б.Азжаргалтай уулзалт хийлээ.
Уулзалтын эхэнд талууд урт хугацааны турш найрсаг хамтын ажиллагаатай явж ирснийг онцлоод цаашид улам өргөн хүрээнд хамтран ажиллахад бэлэн байгаагаа илэрхийллээ. Дархан-Уул аймаг, УБТЗ хувь нийлүүлсэн нийгэмлэгийн хамтын ажиллагааны хүрээнд “Миний-Монгол” цэцэрлэгт хүрээлэнд “Хүүхдийн төмөр зам”-ыг байгуулж ашиглалтад бүрэн оруулсан нь орон нутагт хэрэгжсэн томоохон төсөл хөтөлбөр, бүтээн байгуулалт болсон гэдгийг аймгийн удирдлагууд онцлоод цаашид тодорхой хэдэн асуудлыг шийдвэрлэн, хамтран ажиллахыг хүслээ.
Мөн Улаанбаатар Дархан чиглэлийн авто замын ажил дуустал нэмэлт галт тэрэг өдрийн цагаар явуулж өгөх хүсэлт тавьсан. Энэ дагуу маргаашнаас буюу 2022.04.21 ны пүрэв гаригаас эхлэн Дархан-Улаанбаатар чиглэлд нэмэлт галт тэрэг аялахаар боллоо. Ингэхдээ хуучин цагийн хуваарийн дагуу буюу Улаанбаатар хотоос өглөө 08 цаг 50 минут хөдөлж
Дархан өртөөнд 13 цаг 17 минутад ирэх аж. Харин Дархан өртөөнөөс 14 цаг 07 минутад хөдөлж Улаанбаатарт 19.00 цагт очих аж. Зам засвараас шалтгаалан автомашин зорчиход хүндрэлтэй байгаа тул ийнхүү иргэдийн эд хөрөнгө, цаг завын хэмнэсэн асуудлыг шийдвэрлэж өгсөн иргэд талархалтай байлаа.
Түүнчлэн хамтын ажиллагааны хүрээнд ерөнхий боловсролын 18 дугаар сургуульд төмөр замын мэргэжилтэн бэлтгэх хөтөлбөр хэрэгжиж байгаа. Төгсөгчдийг чиглэлийнх нь дагуу ОХУ-ын их, дээд сургуульд суралцуулах, ажиллаж амьдрах таатай нөхцөлийг бүрдүүлэхэд хамтран ажиллахыг хүссэн юм. Үүний хариуд УБТЗ ХНН-ийн зүгээс төгсөгчдийг Улаанбаатар хотын Төмөр замын дээд сургууль, Эрхүү хотын Төмөр замын тээврийн сургуульд суралцуулах боломжтой гэв. Мөн тээвэр логистик, ажилчдын орон сууцыг нэмэгдүүлэх, “Тэрбум мод” үндэсний хөдөлгөөний хүрээнд гармын дагуу ногоон байгууламж бий болгох зэрэг орон нутгийн удирдлагуудаас тавьсан олон асуудлыг судлан боломжтой бүх хувилбараар хамтын ажиллагааг өргөжүүлэхээр боллоо.
