Богд уулын тусгай хамгаалалттай газарт барилгын ажил эхлүүлснийг Зайсангийн оршин суугчид эсэргүүцэж өнөөдөр мэдээлэл хийв. Тодруулбал, Ар зайсангийн ам буюу Дугуй цагааны хойно УИХ-ын гишүүн Б.Чойжилсүрэнгийн "Говь ресурс хийл" компани 18 давхар 16 блок хорооллын барилгын ажил эхлүүлсэн гэдгийг иргэд хэллээ.
Энэ талаар оршин суугчдын төлөөлөл “Тусгай хамгаалалттай энэ газарт 1,500 орчим айлын орон сууц барьж байгаа талаар сонссон. Энэ бол байж болшгүй асуудал. Богд уулын эргэн тойронд шинээр газар олгодог энэ үйлдлийг зогсоож өгөхийг хотын удирдлагуудаас хүсэж байна. Оршин суугчид бүгд эсэргүүцэж байгаа. Миний хувьд сар орчмын өмнө л барилгын ажлын талаар мэдсэн.
Зайсангийн хотхонууд бүгд гүний худагтай. Ийм орчинд дахин олон оршин суугчтай хотхон барьж болохгүй. Богд уулын дархан цаазат газрыг хамгаалах захиргаа гэж бий. Тэд энэ асуудлыг анхааралдаа аваасай гэж хүсэж байна. Үнэхээр бүтээн байгуулалтаа нэмэх гэж байгаа бол зам засварын ажлаа шийдээд өгөөч ээ" гэлээ.
Энэ талаар Богд уулын хамгаалалтын захиргааны Хяналт шалгалт хариуцсан мэргэжилтэн Г.Барайшираас тодруулахад "Барилгын ажилтай холбоотойгоор "Говь ресурс хийл" компанитай холбогдсон. Тэдний зүгээс тухайн барилгын ажлыг Эко сургууль буюу манай төслийн үргэлжлэл гэж тайлбарласан. Одоогоор холбогдох бичиг баримтаа авчирч ирэхийг тухайн компанийн хүмүүст хэлсэн байгаа. Хариуцсан мэргэжилтнүүд маань үүнийг шалгаж байна" гэв.