Өчигдөр Дэлхийн банкнаас Монгол улсын эдийн засгийн нөхцөл байдлын тайланг танилцуулсан. Цар тахлаас шалтгаалсан эдийн засгийн шок арилж амжаагүй байтал Орос Украины дайн эхэлсэн нь Монголын эдийн засагт бүх талаараа сөрөг нөлөө үзүүлж байгааг онцолжээ. Мөн Монгол улсын гадаад өрийн нөхцөл байдал хүндэрч байгааг санууллаа. Цаашид гадаад өрийн нөхцөл байдалдаа онцгой анхаарч, зөв зохистой удирдаж явах хэрэгтэйг зөвлөж байна. Цар тахалтай байсан сүүлийн хоёр жилд Засгийн газрын өр огцом нэмэгдэж, ДНБ-ий 92 хувьтай тэнцэж байгаа юм. Ирэх жилүүдэд төлөгдөх томоохон бондын өр төлбөрүүд улсын төсөвт дарамт учруулах эрсдэлтэйг ч сануулжээ.
2023 ны аравдугаар сард Хөгжлийн банкны Засгийн газрын баталгаатай босгосон 500 сая ам.долларын бондын эргэн төлөлт, тус оны арванхоёрдугаар сард Самурай бондын 30 тэрбумын эргэн төлөлтийг хийнэ. Дээрх бондуудын хүү үндсэн төлбөрүүд нийлээд 800 орчим сая ам.доллартай тэнцэж байгаа.
Тиймээс одооноос эхлэн Хөгжлийн банкны бондын эргэн төлөлтийг хэрхэн хийх талаар зохицуулалт хийж, арга хэмжээ авахыг зөвлөсөөр байна. Хэрвээ Хөгжлийн банк бондын эргэн төлөлтөө хийж чадахгүй бол Монгол Улс хүнд байдал руу орохыг Дэлхийн банкны эдийн засагчид санууллаа.
