Цахим орчинд идэвхитэй шүүмжлэгчдийн нэг Б.Жаргалсайхан өөрийн фэйсбүүк хуудастаа Норвеги шиг Үндэсний баялагийн сантай болох талаар сонирхолтой өнцөгөөр сэтгэгдлээ буулгажээ.
Тэрбээр "200-300 жилийн зах зээлийн түүхтэй өндөр хөгжилтэй улс орнуудыг гүйцэх, зэрэгцэх тухай ярих нь илүүц мэт. Тэдний өндөр технологи, үйлдвэрлэл, инновацийг Монгол Улсад гүйцэхэд хэцүү. Харин уул уурхайн баялагаар эдийн засгаа тэлсэн, шинэ технологи нутагшуулсан улс орон бий. Тухайлбал үлгэр жишээ Норвеги, Хойд Африкийн Ботсвана гэх улсууд үсрэнгүй хөгжсөн түүхтэй. Өөрөөр хэлбэл хүн төрөлхтний нүдэн дээр буюу хагас зуун жилийн хугацаанд Дотоодын нийт бүтээгдэхүүн нь 500 дахин нэмэгдэж нэг хүнд оногдох ДНБ 90 ам.доллараас 14000 буюу 140 дахин нэмэгдсэн.
Ийм зүйл байх боломжтой, боломжгүй хэмээн эдийн засагчид маргахад хүрсэн билээ. Уул уурхайн баялагаа зөв ашиглах, хуримтлал үүсгэх бодлогыг Ботсвана улсын Засгийн газар төгс хэрэгжүүлсэн билээ. Яг тэр замаар Норвеги улс явуулаад "Норвегийн баялгийн сан"-гаараа дамжуулан хүн төрөлхтөнд туслаж байгаа. Уг сангийн эзэн нь тус улсын иргэд. Иргэдийн санал асуулга дээр тулгуурлан “Microsoft”, “Apple”, “Samsung” зэрэг компаниудад хөрөнгө оруулалт хийдэг. Ард түмний хөрөнгө нь дэлхийн аль нэг улс оронд эргэлдэн улам үржиж байгаа юм. Үүнийг баялгийн эзэд тодорхой хувиа хөгжүүлэлтэд хийдэг бөгөөд манай шиг халамж буюу төсвийн цоорхойг нөхдөггүй. Монгол Улсын тухайд "Үндэсний баялгийн сан"-гийн тухай хуулийн хүрээнд "Эрдэнэс-Монгол" компанийн орлого юүлэгдэх болно. Уг компанид уул уурхайн том төслүүд багтаж байгаа бөгөөд ашиг орлого муутай үрэгдээд дуусдаг байдлыг зохицуулна гэдгээ УУХҮЯ-ны сайд Г.Ёндон мэдэгдэж байна лээ. Манай шиг байгалын баялаг ихтэй улс хуримтлал үүсгэх, түүгээрээ дамжуулан томоохон төсөл хөтөлбөр санхүүжүүлэх, зээл олгох сантай болох нь зөв алхам. Үндэсний баялгийн сан хожим буюу үр хүүхдэд үнэтэй хөрөнгө болон очих болов уу." хэмээсэн байна.