Сонгуульд оролцох нам, эвслүүд гуравдугаар сарын 25-аас өмнө сонгуулийн мөрийн хөтөлбөрөө Үндэсний аудитын ерөнхий газарт өгч, хянуулах хуулийн хугацаатай.
Тиймээс нам, эвслүүд мөрийн хөтөлбөрөө бараг боловсруулж дуусаж байгаа. Ардчилсан намын мөрийн хөтөлбөрийг намын Стратеги, бодлого судалгааны хүрээлэн дээр боловсруулж байгаа аж. АН-ын хувьд мөрийн хөтөлбөр боловсруулахад нэлээд маргаан гарч, нам доторх фракцуудын зөрчил идэвхжиж байгаа бололтой. Намын даргынх нь үг үйлдэл ч АН доторх зөрчлийг улам өдөөж байгаа гэнэ. Тодруулбал, АН-ын дарга Л.Гантөмөр намынхаа 2024 оны сонгуулийн мөрийн хөтөлбөрийг МАН-ын дарга Л.Оюун-Эрдэнийн “Алсын хараа-2050”-тай нийцүүлэн боловсруулах чиглэл өгсөн нь жирийн гишүүдийн дургүйцлийг ихэд хүргэж байгаа бөгөөд АН мөрийн хөтөлбөр боловсруулах ажил гацаанд оржээ.
Ардчилсан нам өмнөх сонгуулиудад мөрийн хөтөлбөрөө боловсруулахдаа иргэд, гишүүд дэмжигчдийнхээ саналыг тусгахын тулд орон даяар аян өрнүүлдэг байсан. Тэгвэл энэ удаагийн сонгуулийн мөрийн хөтөлбөрт иргэд, дэмжигчдийн саналыг аваагүй. Дээр нь намын дарга нь эрх баригч намын даргын бодлогыг үргэлжүүлнэ гэсэнд АН-ын гишүүд уурсаад байгаа аж.
"АН хамгийн том сөрөг хүчин байх ёстой. Харин өнгөрсөн найман жилийн хугацаанд сөрөг хүчин бус МАН-ын дагуул нам хийлээ" гэж жирийн гишүүд нь хүчтэй шүүмжилж буй. Уг нь АН даргатай болж, эмх цэгцдээ ороод жил гаруй хугацаа өнгөрсөн ч энэ байдал өөрчлөгдсөнгүй, мөн МАН-ын даргын “Алсын хараа-2050”-тай сонгуулийн мөрийн хөтөлбөрөө уялдуулах чиглэлийг намын дарга өгсөн нь гишүүд дэмжигчдийн итгэл найдварыг мохоожээ. Эндээс эхтэй Л.Гантөмөрийг даргаас буулгах хөдөлгөөн АН дотор дахиад өрнөж буй бололтой.
Түүнчлэн, Ардчилсан намын удирдлагуудын томилгоонд МАН нөлөө бий гэсэн мэдээлэл ч үнэний ортой. АН-ын Ерөнхий нарийн бичгийн даргаар Ерөнхий сайд Л.Оюун-Эрдэнийн найз Э.Одбаярыг томилох яриа аль эрт, 2023 оны хавраас л яригдаж байв. Дараа нь АН-ын дарга Л.Гантөмөрийн 2023 оны арваннэгдүгээр сард Э.Одбаярыг генсекээр жинхэлсэн цаг хугацаа нь эрх баригч намын Ерөнхий нарийн бичгийн дарга Д.Амарбаясгалангийн төрсөн өдөртэй давхцаж, МАН-ынханд том бэлэг барьсан гэх хошигнол улс төрийн хүрээнд гараад амжсан.
Мөн УИХ дахь АН-ын бүлэг хоёр хуваагдаж, УИХ-ын гишүүн Д.Ганбатаас бүлгийн даргаа авч чадахгүй байсан. Тэгвэл одоогийн бүлгийн дарга О.Цогтгэрэл УИХ-ын даргын дэмжлэгтэй бүлгийн дарга болсон гэдэг. Тодруулбал, Д.Ганбат гишүүн бүлгийн даргаа өгөхгүй байсан учраас УИХ-ын гишүүн О.Цогтгэрэл УИХ-ын тухай хуульд нэмэлт өөрчлөлт оруулах ганцхан зүйл заалттай хуулийн төслийг өргөн барьж, УИХ-аар батлуулж байсан. Ингээд тус хуулийн ачаар тэрээр бүлгийн даргаа авч байсан юм.
Энэ мэт МАН, АН хоёр эрх ашиг нэгдсэн улс төрийн олон шийдвэр бий. Өөрөөр хэлбэл, АН сөрөг хүчин бус МАН-ын дагуул нам болж, хэлснийг нь хийдэг утсан хүүхэлдэй боллоо гэдгийг намын жирийн гишүүд дэмжигчид нь шүүмжилж байна.
