Нийслэл оны өмнө бие даан бонд гаргах эрхээ УИХ-аас авсан.
500 тэрбум ам.доллар хүртэлх бондыг гаднын зах зээл дээрээс босгохоор төлөвлөж байгаа талаар Нийслэлийн Засаг дарга Х.Нямбаатар мэдээлж байсан билээ. Тус санхүүжилтээр гэр хорооллыг орон сууцжуулах буюу 12 мянган айлын орон сууц барих юм.
Тэгвэл нийслэл 12 мянган айлын орон сууц барих газраа бүрэн чөлөөлсний дараа бондоо гаднын зах зээл дээр гаргах юм байна. Өмнөх удирдлагуудын гаргах гэж байсан бонд 17.5 хувийн хүүтэй гарахаар байсан. Үүн дээр орон нутгийн бондын татвар таван хувь авахаар байсан. Тэгвэл гаднын зах зээл гаргах бонд Засгийн газрын үнэт цаасны хүүгээс илүүгүй хүүтэй буюу 8.65-аас дээшгүй хувийн хүүтэй эх үүсвэр гаргахаар төлөвлөж байгаа аж.
Өөрсдөө бэлтгэлээ хийгээгүй байхдаа бонд гаргавал хүү тооцогдох учраас бэлтгэлээ бүрэн хангахаар ажиллаж байгаа гэдгийг Нийслэлийн Засаг даргын нэгдүгээр орлогч П.Сайнзориг хэллээ. Тэрээр "Бонд босгох бэлтгэл ажлуудаа хийгээд явж байна. Бид гаднын зах зээлээс илүү хямд эх үүсвэр олж ирэх гээд байгаа юм. Хямд эх үүсвэр олвол барилгажуулах төсөл хямд болно.
Баянхошуу Сэлбэ дэд төвийн бүтээн байгуулалтын 20-иод мянган айлын орон сууцжуулбал энэ төслийн хүрээнд 25 мянган ажлын байр бий болж, улсын эдийн засагт 2.5 их наядаар нөлөө үзүүлнэ.
Бонд босгоод л маргааш нь хүүгийн тоолуур гүйгээд эхэлнэ. Тэгэхээр бидний бэлтгэл ажил сайтар хангасны дараа мөнгөө босгож байж хүүгийн тоолуур гүйж эхлэх ёстой. Юу юугүй бэлэн биш байж бондоо босгож болохгүй. Өнгөрсөн бонд босгосон алдаанууд бий шүү дээ" гэлээ.
