УИХ-ын чуулганы өнөөдрийн хуралдаанаар "Зөвшөөрлийн тухай хуулийн нэгтгэсэн төсөл болон хамт өргөн мэдүүлсэн хуулийн төслүүд"-ийн анхны хэлэлцүүлгийг хийсэн. Тэгвэл уг хуулинд заасан зарим заалтууд нь УИХ-ын гишүүдийн шүүмжлэлд өртөөд байна.
Тухайлбал, Зөвшөөрлийн тухай хуульд "Сүү, сүүн бүтээгдэхүүнээр үйлдвэрлэсэн шимийн архибуюу нэрмэл архи үйлдвэрлэхдээ тусгай зөвшөөрөл авч байж үйлдвэрлэнэ" гэж заасан. Уг асуудалд УИХ-ын гишүүн Г.Тэмүүлэн өөрийн бодлоо илэрхийллээ. Тэрбээр,
"Зөвшөөрлийн тухай хууль нь ААН-үүдэд үүсээд байгаа хүндрэл бэрхшээлийг, хүнд суртлыг мөн авлигал, хээл хахуулийг байхгүй болгох ёстой. Гэтэл амьдралд нийцэхгүй, тусгай зөвшөөрөл шаардхагүй, хөрсөн дээр буухгүй зүйлүүдийг зохицуулах гээд байгаа. Үүний нэг жишээ нь дээрх жишээ.
Тусгай зөвшөөрлийг аймаг, нийслэлийн засаг дарга олгоно гээд заачихсан. Эргээд тусгай зөвшөөрлийг заавал ААН-үүдэп олгоно гэдэг зохицуулалтыг хийчихсэн байгаа.
Нэрмэл архи үйлдвэрлэж буй газар нь зөвхөн хөдөө орон нутаг байгаад байдаг, үүнийг үйлдвэрлэж байгаа нь хувь хүн, хоршоод, нөхөрлөл байгаа. Гэтэл эдгээр хүмүүст тусгай зөвшөөрөл өгөхөөр заавал ААН байх ёстой болж байгаа юм. Нэг ёсондоо өрхийн орлогыг хумих заалт орж ирсэн гэж харж байна" гэлээ.