Сүүлийн жилүүдэд уур амьсгалын өөрчлөлттэй холбоотойгоор гамшигт болон аюулт үзэгдлийн давтамж нэмэгдээд буй. Зуны улиралд хэвийн хэмжээнээс их бороо орсны улмаас Сэлбэ голын усны түвшин дээшилж, хөрсний чийгийн хэмжээ эрс нэмэгджээ. Мөн дэлхийн дулааралтай холбоотойгоор өвлийн улиралд гэнэтийн дулаарал болон хүйтрэл ажиглагдаж байна.
Энэ сарын 15-16-ны өдрүүдэд нутгийн өмнөд хэсгээр огцом дулаарсан бол говийн аймгуудад өдөртөө нэмэх хэм хүрсэн. Улаанбаатар хотод ч энэ үзэгдэл нөлөөлж өдөртөө тэг градустай байх бол шөнөдөө -20 хэм хүрч огцом хүйтрэх юм. Цаг агаарын эрс тэс өөрчлөлтийн уршгаар нийслэлд үүсээд буй халиа, тошингийн улмаас шар усны үер болж болзошгүйг албаныхан анхаарууллаа.
