Улсын хэмжээнд гамшгаас хамгаалах өндөржүүлсэн бэлэн байдлын зэрэгт шилжүүлсэн.
Учир нь, нийт нутгийн 80 гаруй хувьд цастай таван аймгийн 21 сум шилэн зудтай, 17 аймгийн 82 сум цагаан зудтай байгаа юм. Улбар шар түвшинд шилжүүлснээр шар усны үерт өртөж болзошгүй айл өрхүүдийг нүүлгэн шилжүүлэх, цасанд боогдсон зам давааг чөлөөлөх, малчдад туслах аяныг зохион байгуулах юм байна.
Засгийн газрын хуралдаанаар гурил, өвс, тэжээлийг импортын татвар, НӨАТ-аас чөлөөлөх чиглэл өгсөн. Гэхдээ хаврын чуулган ирэх сарын 15-нд эхэлнэ. Тиймээс ээлжит бус чуулган зарлаж шаардлагатай хуульд өөрчлөлт оруулж, дээрх асуудлыг шийдэхгүй бол малчдад үзүүлэх тусламж оройтох нөхцөл үүсээд байна. Цагаан сарын өмнө ээлжит бус чуулган зарлан хуралдуулж, Баялгийн сангийн тухай хуулийн төслийг хэлэлцэхээр ярьж байсан ч зарлаагүй. Тиймээс малчдын нөхцөл байдал хүндэрч байгаа учраас ээлжит бус чуулганаар дээрх хуулийн төслүүдийг хэлэлцэж магадгүй байгаа юм.
Шадар сайд С.Амарсайхан “Өндөржүүлсэн бэлэн байдал гэдэг нь байнгын үйл ажиллагаатай штаб ажиллана. Мал аж ахуйн салбараа хамгаалах, хур тунадас их орсон учраас шар усны үер болж болзошгүй байна. Тэр хүрээндээ аж ахуй нэгштэй хамтран ажиллаж, урьдчилсан сэргийлэх арга хэмжээ авна.
Өвөл бид малчдадаа тэжээл, өвсийг хөнгөлөлттэй үнээр хүргэсэн. Өвс тэжээлийн нөөц хангалттай биш байна. Импортоор авч байгаа гурил, тэжээлийн үнийг татвараас чөлөөлөхөөр үнэ ханш өсөхгүй байх, хомсдол үүсэхгүй.
Улсын нөөцөөс өнгөрсөн хугацаанд 15 мянган тонн тэжээлийг хямдралтай үнээр малчдад нийлүүлсэн. Нэмээд 6000 тонныг нийлүүлэх гэж байна. Улсын хэмжээнд өдөртөө 300 тонн тэжээл гарах боломжтой. Гурилын хүрэлцээгүй байдлаас тэжээлийн гарц муудаж байгаа учраас импортоор орж ирж байгаа тэжээлийн татварыг бууруулснаар мал аж ахуйн салбар хаваржилтыг хохирол багатай даван туулна” гэсэн юм.
Нэг боодол өвс 11-18 мянган төгрөг, ногоон тэжээл 14-20 мянган төгрөгөөр худалдаалагдаж байна. Өвс тэжээлийн үнэ өнгөрсөн оныхтой харьцуулахад 1000-2000 төгрөгөөр нэмэгджээ. Харин хивэг 22 мянга, хорголжин 40 кг нь 36 мянган төгрөг, овьёос 40 кг нь 40 мянган төгрөгийн үнэтэй байна.
