УИХ-ын хаврын чуулган ирэх сарын 15-нд эхэлнэ. Энэ жил Их хурлын ээлжит сонгуультай учраас дөрөвдүгээр сарын 15 хүртэл хуралдах аж.
Хаврын чуулганы хуралдах хугацаа бага ч гурван асуудлаар сонсгол зохион байгуулахаар төлөвлөж байгаа бөгөөд хоёр түр хороог нь байгуулаад байгаа. Одоогоор нийслэлийн газар олголт, эмийн үнийн өсөлт гэсэн сэдвүүдээр түр хороог байгуулаад байгаа билээ. Нийслэлийн газар олголтын түр хороог Хууль зүй, дотоод хэргийн сайд Б.Энхбаяр ахалж байгаа бол эмийн асуудлын түр хороог УИХ-ын гишүүн Ж.Чинбүрэн ахлан ажиллахаар болсон.
Мөн уул уурхайн салбарт олгосон тусгай зөвшөөрлийн асуудлаар сонсгол зохион байгуулна гэдгийг Ерөнхий сайд Л.Оюун-Эрдэнэ хэлсэн. Тэрээр “Байгалийн баялаг хэсэг бүлэг хүний өмч биш. Нийт иргэдэд үр өгөөжтэй байх Үндсэн хуулийн суурь зарчимд тулгуурлаж өнгөрсөн хугацаанд олгосон ашигт малтмалын лицензийн талаар нээлттэй сонсгол хийх, сонсголын үр дүнд тулгуурлаж уул уурхай компаниудыг олон нийтийн хувьцаат компанийн засаглалд шилжүүлэх, ил тод байдлыг хангах болно” гэсэн юм.
УИХ-ын хяналт шалгалтын тухай хуулийг 2022 онд баталсан. Үүнээс хойш Хөгжлийн банк болон нүүрс тээврийн асуудлаар хянан шалгах сонсголыг зохион байгуулсан. Ингэснээр иргэд олон нийт Хөгжлийн банкны олгосон зээл болон төрийн өмчийн нүүрс тээвэр борлуулалтын талаар мэдээлэлтэй болохоос гадна хяналт шалгалтаар илэрсэн нотлох баримтад үндэслэн хууль хяналтын байгууллага шалгалт явуулсан билээ.
