Өвөрхангай аймгийн нутаг дэвсгэрт өчигдөр болсон автомашины ослын улмаас нэг иргэн хавчуулагдан амиа алджээ.
Тодруулбал, Өвөрхангай аймгийн Хархорин сумын Вангийн-Овоо багийн "Умын-Ам" гэдэг газар хоёр суудлын автомашин мөргөлдөж автомашины эд ангид хоёр хүн хавчуулагдсан байна гэсэн дуудлагыг өчигдөр 11:40 цагт ОБЕГ хүлээн авсан байна. Дуудлага мэдээллийн дагуу тус аймгийн Онцгой байдлын газрын Гал түймэр унтраах, аврах 45 дугаар ангийн алба хаагчдыг очиход Архангай аймгийн Өндөр-Улаан сумаас Улаанбаатар хотын чиглэлд зорчиж явсан "Королла Румион" загварын суудлын автомашин, "Коррола" загварын суудлын автомашинтай мөргөлдөж автомашины эд ангид иргэн Н /67 настай, эмэгтэй/ хавчуулагдаж нас барсан байсныг 60 минут ажиллаж цогцсыг гарган Хархорин сумын сум дундын Цагдаагийн хэлтэст, хүнд гэмтэж бэртсэн нэг зорчигчийг сум дундын Эмнэлгийн яаралтай тусламжийн эмчид хүлээлгэн өгчээ.
Түүнчлэн, Өмнөговь аймгийн Даланзадгад сумд суудлын автомашин замын гэрэлтүүлгийн шон, хашаа мөргөж автомашины эд ангид 1 хүн хавчуулагдсан дуудлага мэдээлэл бүртгэгдсэн байна. Уг дуудлагын дагуу аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчдыг очиход иргэн Э-ийн “Тоёото Камри” загварын суудлын автомашинд зорчиж явсан А/41 настай, эрэгтэй/ автомашины эд ангид зүүн хөл нь хавчуулагдсан байсныг 15 минут ажиллаж гарган, аймгийн Нэгдсэн эмнэлгийн Яаралтай тусламжийн эмчид эсэн мэнд хүлээлгэн өгсөн байна.
Иймд иргэд олон нийтийн замын хөдөлгөөнд анхаарал болгоомжтой оролцохыг ОБЕГ-аас зөвлөж байна.
