СХД-ийн 32 дугаар хороонд айлын хашаанд 5, 9, 12, 15 насны бүтэн өнчин дөрвөн зээтэйгээ амьдардаг. Ц.Оюунцэцэг гуай гурван охин төрүүлж өсгөсөн. Гэвч хоёр охин нь нас барж, тэднийхээ дөрвөн өнчин хүүхэдтэй үлдсэн.
Дунд охин нь 2019 онд 33 насандаа гэнэт л өөд болчихож. Өглөө босоод цай уух гэж байснаа аягаа шидээд уначихсан, дахиж сэргээгүй. Талийгаачийн том хүү тэгэхэд 8 настай, бага нь 3 настай үлджээ. Харин бага охин нь 36 насандаа 2023 оны долоодугаар сард хашааныхаа өвсийг зулгааж байгаад орж ирээд бас л гэнэт унаад нас барчихсан. Талийгаачийнх нь том хүү нь 6 дугаар анги, бага охин нь 5 настай.
Ц.Оюунцэцэг өөрөө цус харваж, зургаан жил хэвтэрт байгаа. Дан бүрээстэй гэрт зутруухан аж төрж, сард 3 кг махаар хоолоо болгодог энэ айлд туслах аяныг "Eguur" агентлаг нийгмийн хариуцлагын хүрээнд эхлүүлсэн билээ.
Өнөө өглөөний байдлаар Ц.Оюунцэцэгийн дансанд 70 сая төгрөг хандиваар цуглаад байна. Дөрвөн зээгээ дулаахан гэрт үлдээхсэн хэмээн ярьж суусан хэвтрийн буурайн хүсэл биелэхэд монголын ард түмэн ийн өгөөмөр халуун сэтгэлээрээ нэгдэж байна. Найман хүүхэдтэй өрх толгойлсон ээж буузных нь махыг өгье гэж ярьж, хувьцааны 104 мянган төгрөгөө хандивласан иргэд ч байна. Түүнчлэн хувцас, хүнс хүргэж өгье хэмээн иргэд ярьж, Өмнөговь, Увс, Дархан-Уул аймгаас өөрт байгаараа туслах хүсэлтэй иргэд холбогдсоор байна.
Өнчирч үлдсэн дөрвөн жаахан үрсийн төлөө өгөөмөр сэтгэлээ зориулж байгаа хүн бүхэнд талархал илэрхийлье.
