Үндэсний баялагийн сангийн тухай хуулийг хамтран боловсруулах санамж бичигт Ерөнхий сайд Л.Оюун-Эрдэнэ, АН-ын дарга Л.Гантөмөр, ХҮН-ын дарга Т.Доржханд нар гарын үсэг зурлаа.
Энэ үеэр АН-ын дарга Л.Гантөмөр "Монгол Улс парламентын засаглалын төлөвшүүлэх чиглэлд тодорхой алхам хийнэ гээд үүний ард гарч чадсан. Парламентын ардчилалыг хөгжүүлэхэд сонгогчдын санал гээгдэхгүй байх нь чухал гээд холимог системийг Үндсэн хуульд тусгасан. Ингэснээр олон нам Монголын Улсын талаар хэлэлцдэг болох юм. Мөн хүйсийн тэгш харилцааг тооцож, эмэгтэйчүүдийн квотыг нэмж, намын жагсаалтаар хүйсийн харилцааг 50:50 болгосон. Цаашид улс төрийн намын санхүүжилтийг ил тод болгох асуудлыг ярилцсан. Монгол Улсын хөрөнгө талын нэг тардаг. Үүнийг хумихын тулд сонгуулийн томсгосон тойрогт хуваах шийдлыг гаргасан. Цаашид хөгжлийн хөтөлбөрүүд дээр санал нийлэх хувилбарыг гаргаж байна. Бид популист улстөрчөөс татгалзана.
Өнөөдөр "Эрдэнэс Тавантолгой" ХК-ийн ногдол ашгийг ярьж байгаа юм. "ЭТТ" ХК-иас хувьцаа эзэмшигч нар ногдол ашиг авах нь хуулийн дагуух үйл явц. Харамсалтай нь энэ компанийг ашигтай ажиллуулж чадахгүй өдийг хүрч байгаа нь Монгол Улс баялгийн төлөө уралдсан, дээрэм тулаан болж, нэг үгээр баялгийн хараал хүртсэн. Үүнээс гарахын тулд бид авч хэрэгжүүлж болох боломжоо хэлэлцлээ. Улс төрөөс ангид Үндэсний баялгийн сантай болох шийдэлд хүрсэн. Баялагт тавих хараа хяналтаа сайжруулж, олж байгаа жаахан мөнгөө ирээдүйд зөв ашиглах, хуримтлуулах, иргэд хувьцаагаараа дамжуулж ногдол ашгаа авах хувилбар дээр нэгдээд санамж бичиг зурлаа. Мэдээж санал зөрөлдсөн зүйлс бий. Гэхдээ баялгийн хараалаас салж, үүнийг баялгийн ерөөл болгож, түүнийг тэгш шударга хуваарилах, ард түмний өмч байна гэдэг Үндсэн хуулийн хүрээнд санамж бичгээ байгууллаа." гэлээ.
