Монгол Улсын Ерөнхий сайд Л.Оюун-Эрдэнэ энэ жил хоёр улсын харилцаа тогтоосны 75 жилийн ой тохиож буй Бээжин, Улаанбаатарын харилцаа бат бөх байгааг онцлоод, манай улс Хятад улсыг итгэлтэй анд, түнш хэмээн үздэг хэмээн “China Daily” сонинд өгсөн тусгай ярилцлагадаа дурджээ.
Монгол Улс 1949 онд БНХАУ-тай дипломат харилцаа тогтоосон анхны улсуудын нэг юм. Мөн энэ онд хоёр талын найрсаг харилцаа, хамтын ажиллагааны гэрээ байгуулсны 30 жил, Хятад, Монголын иж бүрэн стратегийн түншлэлийн харилцаа тогтоосны 10 жилийн ой тохиож байна.
Монгол Улсын Ерөнхий сайд Л.Оюун-Эрдэнэ “Хоёр улсын гол анхаарал хандуулж буй зүйл бол эрдэс баялаг, эрчим хүч, дэд бүтэц, ногоон хөгжил зэрэг чухал салбар дахь хамтын ажиллагааг идэвхжүүлэх явдал юм. Эдгээр салбар дахь хамтын ажиллагааг өргөжүүлэн, харилцан ойлголцлыг бий болгоход анхаарч байна. Бид хамтдаа орчин үеийн хөгжлийн замаар харилцаагаа ахиулж, амжилтад хүрэхийг зорьж, үлгэр жишээ харилцаагаа бататгаж, бүс нутаг, дэлхийн энхтайван, тогтвортой байдал, хөгжилд чухал хувь нэмэр оруулахыг эрмэлзэж байна" гэв.
Хятад улс олон жил дараалан Монголын хамгийн том худалдааны түнш, хөрөнгө оруулагч байсаар ирсэн. Гаалийн ерөнхий газрын мэдээлснээр 2023 онд Хятад, Монголын худалдаа өнгөрсөн оны мөн үетэй харьцуулахад 36.1 хувиар өсөж, 17.49 тэрбум ам.долларт хүрч түүхэн дээд амжилт тогтоожээ.
Хоёр талын худалдаа, эдийн засгийн хамтын ажиллагааг хөгжүүлэх дунд хугацааны хөтөлбөрт тусгагдсанаар худалдааны хэмжээг ойрын жилүүдэд 20 тэрбум ам.долларт хүргэх зорилт тавьсан. Тээврийн хүчин чадал, хилийн боомтын байгууламжийг сайжруулах нь хоёр талын худалдааг хөгжүүлэхэд чухал ач холбогдолтой гэдгийг Монгол Улсын Ерөнхий сайд онцоллоо.
Тэрээр "Дэд бүтэц, ялангуяа төмөр замыг сайжруулах нь түүхий эдийн экспортыг нэмэгдүүлэхэд чухал ач холбогдолтой. Монгол, Хятадын Засгийн газар хил дамнасан төмөр замыг холбох асуудлаар бүх түвшний хэлэлцүүлэгт идэвхтэй оролцож байна" гэв. Мөн “Бүс ба Зам” санаачилгын хүрээнд далайд гарцгүй хөгжиж буй 32 орны нэг болох Монгол Улс “Ази, Европыг холбосон газарзүйн стратегийн байрлалаа ашиглахыг зорьж байна” гэж Л.Оюун-Эрдэнэ хэллээ.
Тэрээр "Бүс ба Зам санаачилга нь оролцогч улс орнуудын дэд бүтэц, худалдаа, санхүүгийн хамтын ажиллагааг дэмжих замаар хамтын ажиллагааны шинэ гарцуудыг бий болгож, бүс нутаг, дэлхийн эдийн засгийн сэргэлт, өсөлтийг хангах боломжтой гэж бид үзэж байна" гэв.
2023 оны зургадугаар сард БНХАУ-д айлчлах үеэрээ Монгол Улсын Ерөнхий сайд дарга Ши Жиньпин болон БНХАУ-ын бусад удирдагчидтай уулзаж, Тяньжин боомтоор зочлохын зэрэгцээ тус боомтоор эрчим хүчний нөөцийг бусад улс руу экспортлоход ашиглах төлөвлөгөөний талаар боомтын операторуудтай ярилцсан. Хятад, Монгол хоёр улс цөлжилт, уур амьсгалын өөрчлөлтөөс үүдэлтэй сорилттой тулгараад байгаа энэ үед Л.Оюун-Эрдэнэ хамтын хариу арга хэмжээ авахын тулд хоёр талын хамтын ажиллагааг бэхжүүлэх боломжтойг онцоллоо.
Өнгөрсөн онд хийсэн үнэлгээгээр Монгол орны нийт нутаг дэвсгэрийн 76.9 хувь нь цөлжөөд байгаа ажээ. Цөлжилтөөс урьдчилан сэргийлэх, ургамлыг нөхөн сэргээх, ойжуулах зэрэг экологийн хөгжлийн чиглэлээр үйл ажиллагаа явуулах зорилготой төсөл болох Цөлжилттэй тэмцэх хамтын ажиллагааны төвийг Улаанбаатар хотод байгуулахаар хоёр улс аль хэдийн тохиролцоод байгаа юм.
Эх сурвалж: Сhinadaily
