Эрүүл мэндийн сайд С.Чинзориг өчигдөр ГССҮТ-ийн салбар эмнэлэг Түлэнхийн төвд ажиллав. Дэлбэрэлтэд өртөж, эрчимт эмчилгээний тасагт эмчлүүлж байгаа зургаан хүний биеийн байдал хүнд байна. 80-90 хувийн түлэгдэлттэй гурван хүний биеийн байдал маш хүнд, бүгд амьсгалын аппараттай байгааг эмнэлгийнхэн хэлсэн юм.
Эмчилгээ үйлчилгээний хувьд хүндрэл учраагүй, чухал шаардлагатай эм тарианы нөөц хангалттай байгаа аж.
Харин түлэгдсэн хүмүүст зайлшгүй хэрэглэдэг альбумин уургийн бэлдмэлийг нөөцлөх шаардлага байгаа тул санхүүжилтийг шийдвэрлэж өгөхийг эмнэлгийнхэн сайдаас хүсэв.
Улмаар салбарын сайд хугацаа алдахгүй санхүүжилт шийдвэрлэж өгөхөд анхаарна гэдгээ мэдэгдэж, өвчтөнүүдийн ар гэрийнхэнд зориулан зай талбай томтой өрөө тасалгаа гаргах, сахиуруудыг амарч, цай хоол идэж уух боломжтой байлгахад анхаарах үүргийг эмнэлгийн удирдлагуудад өглөө.
