2024.01.24-ний шөнийн 01:07 цагт Баянзүрх дүүргийн 26 дугаар хороо Дүнжингаравын уулзварт 60 тн газ тээвэрлэж явсан автомашин зам тээврийн ослын улмаас дэлбэрч гал түймэр гарсан.
Урьдчилсан байдлаар гал түймэрт 3 хүн амь насаа алдаж, түлэнхийн төвд 10 иргэн, Цэргийн төв эмнэлгийн хордлогын төвд 1, Эх хүүхдийн эрүүл мэндийн төвд 3 хүүхэд хүргэгдэн эмнэлгийн тусламж үйлчилгээ авч байна.
Эмнэлэгт хүргэгдэн эмчлүүлж буй иргэдийн биеийн байдлын талаар Гэмтэл согог судлалын үндэсний төвөөс мэдээлэл өглөө.
ГССҮТ мөн салбар эмнэлэг Түлэнхийн төв дээр нийт 14 хүн ирснээс 4 хүн анхны тусламж үйлчилгээ аваад явсан. 10 хүн хэвтэн эмчлүүлж байгаагаас 5 хүн нь энгийн тасагт 5 хүн эрчимт эмчилгээний тасагт хэвтэн эмчлүүлж байна.
Эрчимт эмчилгээний тасагт хэвтэн эмчлүүлж байгаа хүмүүс түлэнхийн 3 дугаар зэрэгтэй буюу биеийн 80-90 хувийн хүнд гэмтэлтэй байна.
Одоогоор бага насны хүүхэд ирээгүй. Бүгд эрэгтэй хүмүүс. Түлэнхийн төвд хэвтэн эмчлүүлж байгаа иргэдийн биеийн байдал харьцангуй тогтвортой байна. Иргэдийн биеийн байдал онцлогоосоо шалтгаалан эдгэрэлтийн явцын хугацаа өөр өөр байна.
Эмч нар өвчтөнүүддээ шарх боолт болон мэс ажилбарын тусламж үзүүлэн ар гэрийнхэнд нь 2 цаг тутам мэдээллийг өгч ажиллаж байна.
