Нийслэлийн зам талбайн халтиргаа гулгааг арилгах асуудлаар Хотын дарга Х.Нямбаатар "Оны өмнө БНХАУ-аас хүйтний нөхцөлд цаснаас үүдэлтэй халтиргаа гулгааг хайлуулах чадвар харьцангуй өндөр бодис 1,200 тонныг авахаар гэрээ хийгээд 200 тонн нь түрүүлж ирсэн. Өнөөдрийн байдлаар Захирагчийн ажлын албаны мэдэлд ОХУ-аас 200, БНХАУ 1,200 гээд 1,400 тонн бодис ирсэн байгаа.
Сүүлийн үед өдөртөө дулаарч, оройдоо хүйтний эрч чангарснаас үүрээр халтиргаа гулгаа үүсгэх магадлал өндөр байна. Гаднаас мэргэжилтнүүд авчирч, давс, бодисыг ямар хэмжээгээр цацах талаар сургалт авч байна. Мөн хот нийтийн аж ахуйн чиглэлийн алба хаагчид өдөр шөнөгүй л ажиллаж байна. Ажилтнуудын орон тоог нэмэгдүүлэх, цэвэрлэгээний үнэлгээг нэмэх журам гаргасан.
Хэт хүйтэрсэн үед халтиргаа гулгаан дээр давс цацах шаардлагагүй. Сүүлийн үед дотоодын давсны өртөг гадаадаас авч буй бодисын өртөгтэй тэнцүү байгаа. Илүү хайлуулах чадвартай бодисыг их хэмжээгээр татаж авсан, дутагдах зүйл байхгүй. Дөрвөн төрлийн бодисыг гаднын хотууд цэвэрлэгээнд ашигладаг юм байна. Үүнээс хамгийн сүүлийн үед ашиглагдаж байгаа магни гэдэг бодисыг худалдан авахаар судалж байна.
Хужир ихтэй, байгалийн гаралтай цэвэрлэгээний бодисуудаас хотууд татгалзаад 2, 3 дугаар үеийн бодисуудыг хэрэглэдэг болсон. Сүүлд хэрэглэгдэж буй бодисуудыг ОХУ, Хятадаас авсан. Цас цэвэрлэдэг техник хэрэгслүүд авахаар өнгөрсөн сард зургаан багц тендер зарласан. Үйлдвэрлэгчээс нийлүүлэх байгууллага тендерт оролцсон. Нэг ААН шаардлагуудыг хангасан ч Сангийн яамны хар жагсаалтад орсон байв. Өнгөрсөн долоо хоногт үнэлж дуусаад бүхэлд нь хүчингүй болгосон. Үнэлгээний хороо хуралдаж, дахин тендер зарлана" гэлээ.
