УИХ-ын гишүүн А.Адъяасүрэн Хөрөнгө оруулалтын тухай хуультай холбоотой байр сууриа илэрхийлжээ.
Тэрбээр, "Сонгогчдоос, иргэдээс маш их санал ирж байна. Иргэдийн дуу хоолой болж байгаа учраас иргэдийн үгийг энд хүргэх ёстой гэж бодож байна.
Гадаадын хөрөнгө оруулалтыг дэмжихгүй байна гэж үгийг минь битгий гуйвуулаарай. Монгол хүн Монгол газар нутагтаа эзэн байх тухай би ярих гэж байна. Хөрөнгө оруулалтын тухай хууль гэчхээд Хөрөнгө оруулалтын босгогүй болгож байгаа нь хөрөнгийг татах биш мөнгөгүй гадаад хүнийг оруулж газраа өгөх далд санаа агуулсан ийм хууль оруулж ирж байгаад миний бие харамсаж байна.
Дэлхийн улс орнуудад гадаадын хөрөнгө оруулалтын хуульдаа тодорхой нөхцөлүүдийг тавьдаг. Тухайлбал, АНУ гадаадын хөрөнгө оруулалтын статус авахын тулд 800 мянган долларын босго тавьдаг. Солонгос 100 сая вон, Тайланд 10 сая вотын босгыг шаарддаг. Босгоо намсгахгүй бол хөрөнгө оруулалт хийхгүй гэсэн гадаадын нэг ч бизнес байхгүй.
Манайд томоохон хөрөнгө оруулагчид орж ирэхгүй байгаа шалтгаан нь юу юм? Тэгвэл хамгийн том шалтгаан нь гэвэл хууль эрх зүйн орчин тогтворгүй байгаа. Хууль байнга өөрчлөгдөж байдаг энэ эрсдэлийг тооцож гадаадын хөрөнгө оруулагчид орохгүй ирэхгүй байгаа юм аа. Энэ хуульд сүүлийн 11 жилийн хугацаанд 11 удаа өөрчлөлт орсон байна. Хүрэлбаатар гишүүний оруулж ирээд байгаа энэ хууль батлагдлаа гэж бодоход, жинхэнэ хөрөнгө оруулагчид итгэж орж ирэх юм уу? Дараа жил нь дахиад л өөрчлөгдөх хуульд хэн итгэх юм" гэлээ.
