Сэлбэ голын халиа, тошингийн нөхцөл байдалтай хотын дарга Х.Нямбаатар танилцлаа.
Хотын дарга Х.Нямбаатар "14 байршил буюу Сэлбэ, Дунд, Наран, Туул голын сав газар халиа тошинг үүсээд байгаа. Өнөөдрийн байдлаар анхаарал татаж байгаа, олон жилийн дунджаас илүү халиа үүсэж байгаа зургаан байрлал байна. Үүний нэг нь Сэлбэ голын энэ хэсэг өмнөх жилүүдээс 20 см-ээр илүү халиа үүссэн байна. Бид голын сав газрын далан, гүүрэн байгууламжид эвдрэл өгөхөөс урьдчилан сэргийлэх зорилготой сувагчлах ажлыг хийгээд явж байна.
Захирагчийн ажлын алба, Геодези усны барилга байгууламжийн газар, ОБЕГ-аас халиа инженерийн барилга байгууламжид эрсдэл учруулах нөхцөл байдал үүсвэл мөсийг зөөх бэлтгэл ажлыг хийгээд байна. Одоогийн байдлаар 1000 гаруй м3 мөсийг зөөж, шилжүүлсэн. Шаардлагатай гэж үзвэл хүндэрсэн байршлууд дээр мөсийг хагалж, зөөх хүн хүч, төлөвлөгөө бэлэн байгаа" гэлээ.
Түүнчлэн, тэрээр нийслэлд үүсээд буй халтиргаа гулгаатай холбоотой мэдээлэл өгөхдөө “Бид оны өмнө БНХАУ-аас хүйтний нөхцөлд хайлуулах чадвар харьцангуй өндөр бодис 1200 тонныг авах гэрээг хийж, 200 тонн нь ирсэн. Өнөөдрийн байдлаар ОХУ-аас 200 тонн, БНХАУ-аас 1200 тонн гээд нийтдээ 1400 тонн бодис орж ирээд байна. Сүүлийн үед өдөртөө температур буурч оройдоо хүйтний градус өндөр байгаа учир халуун, хүйтний зөрүүнээс шалтгаалаад огт цасгүй зам дээр хүртэл халтиргаа гулгаа, филонк үүсч байна. Тиймээс гаднаас мэргэжилтэн авчирч хот нийтийн аж ахуйн мэргэжилтнүүдэд давс, бодисыг ямар цаг үед, ямар хэмжээгээр цацах талаар сургалт, орчуулга хийж байна. Шүүмжлэлтэй хандаж магадгүй ч 2023-2024 оны өвлийн улиралд ойрын жилүүдэд ороогүй хэмжээгээр их цас орж байгаа. Тиймээс хот нийтийн аж ахуйн албан хаагчид өдөр шөнөгүй ажиллаж байна. Иймд орон тоог нэмэх, м2-ын үнэлгээг өсгөх чиглэлээр шинэ журам гаргасан. Давсны тухайд хэт хүйтэрсэн үед цацах шаардлагагүй. Илүү хайлуулах чадвартай давсыг хот нийтийн аж ахуйд хэрэглэе гэдэг агуулгаар энэ өвөл бодисыг илүүтэй татаж авсан” гэлээ.
