УИХ-ын нэгдсэн чуулганы хуралдаанаар Хөрөнгө оруулалтын тухай хуулийн шинэчилсэн найруулга болон хамт өргөн мэдүүлсэн хуулийн төслүүдийг хэлэлцэж байна.
УИХ-ын гишүүн, ХХААХҮ-ийн сайд Х.Болорчулуун:Ер нь ямар ч хүн хөрөнгө оруулалтыг, хөрөнгө оруулагчийг дэмжинэ. Гэхдээ энэ оруулж ирж байгаа хууль бол үнэхээр учир дутагдалтай байна, Эдийн засгийн яамныхаан, Хүрэлбаатар сайдаа. Аливаа хөрөнгө оруулалтыг хийхдээ улс орнууд босгыг зааж өгсөн байдаг. Манай хуулинд ч байсан. 2013 онд Хөрөнгө оруулалтын тухай хуулийг шинэчлэн найруулах тухай ярьж байхад 100 мянган ам.доллараас дээш хөрөнгө оруулбал хөрөнгө оруулагч гэж нэрлэнэ гэдэг дээр бас л маргаж байсан. Гэтэл өнөөдөр орж ирж байгаа шинэчилсэн найруулга дээр энэ босго алга. Энэ бол аюул дагуулна. Хөрөнгө оруулагчийн нэрээр, хөрөнгө оруулалт нэрээр цагаач иргэд нөмрөх вий гэсэн болгоомжлол төрүүлж байна.
Шинэ хуулиар барилга байшин, машин механизм оруулж ирээд хөрөнгө оруулагч болох юм байна. Энэ бүхэн чинь хэрэглээний зүйл учраас хөрөнгө оруулагч гэж хэлж болохгүй. Хуулинд босго байх ёстой. Босгыг нь авч хаяснаар аюул дагуулж байна. Энэ байдлаар Монгол үндэстэн газар нутаг дээрээ цөөнх болохыг үгүйсгэх арга алга. Мөн тогтворжилтын гэрчилгээ олгоно гэжээ. Гэтэл энэ нь хэтэрхий бага байна. 10 тэрбумын ажил үйлчилгээ бизнес гэдэг чинь бага. Ер нь улс орныг зэр зэвсгийн хүчээр эзлэхээ больсон. Хуулиар нь дамжуулж, улс орныг хохирооно, баялгийг булаана. Тииймээс ийм байдалтай орж ирж байгаа хөрөнгө оруулалтын хуулийг дэмжихгүй.
Эдийн засгийн хөгжлийн сайд Ч.Хүрэлбаатар: Дэлхийн бүх орон өндөр босготой гоё яваад байгаа гэж ярьж байна. Хэдүүлээ цээжний бангаар яримааргүй байна. Дургүй зүйлээ үлгэр зохиогоод ярьчихдаг. Бодит байдлаа хэдүүлээ харж яримаар байна шүү дээ, Болорчулуун сайд аа.НҮБ-ын мэдээллийн санд байгаа 136 орноос 24 орон л хөрөнгө оруулалтын босготой. Конго, Этиоп, Уганда, Венесуэл, Монгол гэх мэт. Энэ улс орныг хөгжүүлмээр байна аа, Болорчулуун сайд аа. Танай хариуцсан салбар өнгөрсөн жил 8 хувиар буурсан байгаа. Энэ асуудлыг та өөрөө санаачилж ярьж байх ёстой. Гадны цагаач иргэд орж ирдэг зүйл хөрөнгө оруулалтын тухай хуулиар шийдэгдэхгүй.Гадаадын иргэдийн эрхзүйн орчныг тодорхойлдог хуулиар шийдэгдэнэ. Энэ чинь Хөрөнгө оруулалтын тухай хууль. Та заавал ингэж Хөрөнгө оруулалтын тухай хуулийг эсэргүүцэж байх ямар шаардлага байна. Зөндөө л тайлбарласан шүү дээ. Та бид хоёр нэг Засагт сууж байгаа гэж би ойлгож байгаа.
