УИХ-ын гишүүн, Уул уурхайн дэд сайд, Байгаль орчны яамны төрийн нарийн бичгийн дарга, Шүүхийн шийдвэр гүйцэтгэлийн ерөнхий газрын дарга, Хан-Уул дүүргийн Засаг даргаар ажиллах хугацаандаа багагүй хэл аманд өртөж байсан Д.Загджав Үндэсний аудитын газрын ерөнхий аудиторын орлогчоор ажиллахаар болжээ.
УИХ-ын 2024 оны сонгуульд нэр дэвшихээ илэрхийлж, өнөөдөр УИХ-ын чуулганаар Үндэсний аудитын газрын даргын албан тушаалаас чөлөөлөгдсөн Д.Занданбат намын ах, нэгэн цагт өөрийн дарга байсан Д.Загджавыг явахаасаа өмнө энэхүү албан тушаалд томилсон байна.
Д.Загджавын хүү Үндэсний аудитын газарт ажилладаг тухай мэдээлэл өмнө нь гарч байсан бол энэ удаад "ноён" өөрөө суудал авсан аж.
Дэлэгийн Загджав 1964 онд төрсөн гэхээр уг нь ирэх жил тэтгэврийн нас нь болж байгаа хүн. Гэвч нам дотроо нөлөөтэй нэгэн гэдгээ баталгаажуулж, аудитын газарт суудал засан тухлав бололтой.
Тэрээр Нийгмийг аюулаас хамгаалах яамны Цэргийн дээд сургууль төгссөн. Төрийн захиргааны удирдлагын хөгжлийн институт, Төрийн удирдлагын академи, ОХУ-ын Новосибирск хотын Эдийн засгийн удирдлагын академийг төгссөн. Хэдийгээр муу нэртэй, луу данстай явдаг ч МАН түүнээс албан тушаал төдийлэн харамлаж байсангүй. ШШГЕГ-ын даргаас хариуцлага алдсан хэмээн 2022 онд ажлаас чөлөөлөгдсөн ч ОХУ руу Элчин сайдаар томилох тухай яриа ч өрнөсөн байдаг.
