УИХ-ын Хянан шалгах түр хорооны өнөөдрийн хуралдаанаар “Эрдэнэс Тавантолгой” ХК-д Таван толгой ордын Бортээгийн уурхайд үйлчилгээ үзүүлэгчийг сонгон шалгаруулах тендер шалгаруулалтад шалгарсан МТАС түншлэлийн талаар шинжээчийн мэдээллийг сонсч, гэрчээс гишүүд асуулт асуув.
“МТАС” гэх түншлэлд багтсан компанийн хамаарал бүхий хүмүүс, компаниуд.
Шинжээч: "Монголиан контракт майнинг сервис" ХХК нь- "Хишиг арвин индустрал" ХХК-ийн охин компани
Үүсгэн байгуулагч нь Б.Баттулга буюу УИХ-ын гишүүн асан Батж, Батбаярын хүү. "Степхолдинг" ХХК тус компанийн хувьцааг эзэмшдэг бөгөөд үүсгэн байгуулагч, гүйцэтгэх захирлаар нь Б.Баттулга ажилладаг
“Таванхур” ХХК- Д.Саруултуяа, Д.Даяндэмэд үүсгэн байгуулагч нь. Тус компанийн 30 хувийг “Тэргэннүүр” ХХК эзэмшдэг. “Тэргэнннүүр” ХХК нь С.Энхболд гэж хүний эзэмшлийнх.
Мөн Д.Саруултуяагийн нэгдмэл ашиг сонирхолтой “Бүргэд транс” ХХК-ийн хувьцаа эзэмшигч Д.Давгадорж нь "Тавантолгой" ХК-ийн ТУЗ-ийн дарга байсан. Тэрээр “Тавантолгой транс” ХХК-тай нэгдмэл ашиг сонирхолтой.
“Таван хур” ХХК-ийн 40 хувийг эзэмшигч Д.Даяндэмэдийн үүсгэн байгуулсан “Рейн клауд” нь Сангийн сайд Б.Жавхлангийн дүү Б.Амгалантай нэгдмэл ашиг сонирхолтой.
“Админерал” ХХК-ийн гүйцэтгэх удирдлагаар БНХАУ-ын иргэн Хасбаатар ажилладаг.
БНХАУ-ын "Чоу Лоуяан трэйдинг," “Хонконг Руйшен Глобал групп” ХХК-аас гадна Монголын “Моноват” ХХК хамтран үүсгэн байгуулсан.
“Моновант” ХХК нь үүсгэн байгуулагч БНХАУ-ын иргэн Хасбаатар /20 хувь/ болон Монголын иргэн Ц.Лхамжав /80 хувь/.
Ц.Лхамжавын дүү нь Ц.Чулуунзагд. МАН-ын нарийн бичгийн дарга
Ц.Чулуунзагдын хамаарал бүхий хуулийн этгээдээр “МКАСТ” ХХК. Үүсгэн байгуулагч нь Ц.Чулуунзагд, Г.Асралт, Б.Алтангэрэл.
Ц.Чулуунзагд нь “Төрөлх Алтай” НҮТББ, Хүний эрх дэвшилтэт бодлогын хүрээлэн НҮТББ зэргээр ЗГХЭГ-ын дарга Д.Амарбаясгалан, ЦХХХ-ны дэд сайд Ж.Эрхэмбаатар нартай хамаарал бүхий гэсэн мэдээлэл гарсан байна.
Мөн “Зиндаа медиа” ХХК-ийг Х.Мандахбаяртай хамт эзэмшдэг. Тус компанийн гүйцэтгэх удирдлагаар Э.Амаржаргал ажилладаг. Үүнээс гадна Э.Амаржаргал, Ц.Чулуунзагд нар нь "Бууч" ХХК хамтран үүсгэн байгуулсан бол Э.Амаржаргал нь Н.Өнөрцэцэгтэй хамтран “Нэтикс майнинг про”-ийг байгуулжээ. Н.Өнөрцэцэг нь “Ган үзэгтэн” НҮТББ-ыг О.Шүрэнсувдтай хамт байгуулсан бол О.Шүрэнсувд нь нүүрс тээврийн үйл ажиллагаа эрхэлдэг "Мон мажор транс" ХХК-ийг Д.Баянмөнх, Ц.Нямдулам нартай хамтран үүсгэн байгуулсан. Эцсийн өмчлөгч нь Д.Баярмөнхөд 2022 оны 12 дугаар сард хувьцаагаа 100 хувь шилжүүлсэн.
ХЗДХ-ийн сайд Б.Энхбаяр: "Админерал" ХХК-ийн гүйцэтгэх захирал Ц.Лхамжав нь “Хонконг Руйшен Глобал групп” лимитид ХХК-аас нийт 30 сая ам.доллар авсан гэдэг баримт sonsgol.mn дээр ирсэн. Та энэ мөнгийг ямар учиртай авсан бэ, юунд зарцуулав?
Админерал ХХК-ийн гүйцэтгэх захирал Ц.Лхамжав: Би чинь гадны хөрөнгө оруулалт татаад үйлдвэр барьж байгаа бизнес эрхлэгч. Манай үйлдвэр ашиглалтад ороход бэлэн болсон. Манайх Монголын төр, Хятадын төрөөс ямар ч мөнгө төгрөг аваагүй. Үйлдвэрт оруулсан хөрөнгө оруулалтын тооцоо нийлсэн дүн. Үйлдвэрийн ТЭЗҮ-гээр 58 сая ам.долларын бүтээн байгуулалт. Хамтын ажиллагааны гэрээн дээр бид энэ мөнгийг буцааж төлөх юм шүү дээ.
