"Говь+Ус" өмнийн говийг усжуулах шийдэл, Монгол Улсад усны инженер бэлтгэж эхэлсний 60 жилийн ойд зориулсан улс, аймгийн алдар цолтой 128 бөхийн барилдаан өчигдөр/2023.12.16/ боллоо. Тус барилдаанд Баянхонгор аймгийн Баянбулаг сумын харьяат, улсын үнэн зоригт харцага Н.Золбоо түрүүлж "Усны элч"-ээр өргөмжлөгдөн цом гардсан бол Дорнод аймгийн Дашбалбар сумын харьяат, улсын заан Доржийн Анар үзүүрлэв.Шөвгийн дөрөвт Төв аймгийн Сүмбэр сумын харьяат, улсын начин Г.Ганжад, Завхан аймгийн Отгон сумын харьяат, улсын начин Т.Дүгэрдорж нар шалгарлаа. Харин наймд улсын харцага Б.Цэдэнсодном, улсын начин Д.Амаржаргал, аймгийн хурц арслан Х.Энхчулуун, аймгийн өсөх, өрнөх начин М.Гантулга нар үлджээ.
Тус барилдааныг зохион байгуулагчдын зүгээс “Улсын цолд ойрхон” бөхийн шагналыг Өмнөговь аймгийн Өмнөговь аймгийн Гурвантэс сумын харьяат, аймгийн заан Б.Баянсүхэд, “Уран барилдааны шагнал”-ыг Архангай аймгийн Тариат сумын харьяат, цэргийн заан Ө.Батсуурьт тус тус гардуулсан юм.
Дараагийн барилдаан энэ долоо хоногийн амралтын өдрүүдэд сумын цолтон залуу бөхчүүдийн ээлжит барилдаан, Ховд бөхийн дэвжээнээс санаачлан зохион байгуулж буй Ховд аймгийн Буянт сумын харьяат, Монгол Улсын гавьяат дасгалжуулагч, XX зууны манлай заан Дасрангийн Мягмарын нэрэмжит улс, аймгийн алдар цолтой 128 бөхийн барилдаанаар тус тус үргэлжилнэ.
