УИХ-ын чуулганы хуралдаан үргэлжилж байна. Монгол орны ойн сангийн төлөв, “Тэрбум мод” үндэсний хөдөлгөөний явц, цаашид хэрэгжүүлэх арга хэмжээний талаар мэдээлэл өгч байна.
УИХ-ын гишүүн Д.Ганбат “Монгол Улсын Ерөнхийлөгчийн санаачилга маш зөв байдаг. Гэхдээ та нар дээр очихоороо гацчихаад байна. Б. Бат-Эрдэнэ сайд Баянхонгор аймагт хурал зохион байгуулсан гэнэ. Таны хурал цуглаан хэтэрлээ. Баянхонгор аймаг бургасан модоор дүүрэн байсан шүү. Энэ 10 сайдыг солих цаг болсон.
Урд хөрш БНХАУ мод тарихдаа автоматаар усалдаг, ургуулдаг сайн жишээ байна шүү дээ. Богд уул дархан цаазат газар гэтэл танай намынхан бэл болгонд нь байшин барьчихсан байна. Мөн Улаанбаатарт ногоон байгууламж байхгүй. Хот, хөдөө гэлтгүй ногоон байгууламж байхгүй. Ядаж хэдэн мод тарьснаа хэлээч ээ” гэв.
БОАЖ-ын сайд Б.Бат-Эрдэнэ “Тэрбум мод үндэсний хөдөлгөөн эхэлснээс хойш 41,5 сая мод тарьсан. Баянхонгор аймагт 325,408 мод тарьжээ. Бид хөв цөөрөм байгуулан мод тарьж ургуулж байна. Монгол Улсын газар нутгийн 76,9 хувь нь цөлжилтөд нэрвэгдсэн.
Энэ хөдөлгөөний хүрээнд ногоон бүс буюу цөлжилтөөс сэргийлэх арга хэмжээг авч байна. Улаанбаатар хотод 2 сая орчим ширхэг мод тарьж ургуулсан дүгнэлт байна. Богд хан уулын асуудалд манай танай нам гэлтгүй улс төрийн албан тушаалтнуудтай холбоотой. 2023 онд Богд хан уулын орчимд нэг ч газар олголт хийгээгүй. Газар цуцалтын хэмжээ 1000 га газар хүрсэн. Төлөвлөлтгүй газар зохион байгуулалтаас болж гарсан сөрөг үр дагаврыг монголчуудад их багагүй нөлөөлж байгаа. Тэрбум мод хөдөлгөөн ганцхан мод тарих асуудал биш хөрс, цэвдгийг хамгаалах асуудал” гэж хариулав.
