-PISA-ын үнэлгээг Сингапур тэргүүлж, Эстони Европт нэгдүгээрт эрэмбэлэгдэв-
Янз бүрийн улс орны 15 настай хүүхдүүдийн боловсролын чанарыг гурван жил тутамд үнэлдэг олон улсын судалгаа болох PISA-гийн үнэлгээгээр Сингапурын сургуулийн сурагчид дэлхийн шилдэг хүүхдүүдээр тодров. Сурагчдыг унших, математик, байгалийн ухаан гэсэн гурван ангиллаар шалгадаг. Дашрамд дурдахад саяхан болсон энэ үнэлгээнд Монгол улс хамрагдсан юм.
Энэ удаагийн судалгаанд 81 орон оролцсон байна. Өмнөх уламжлалуудаас харахад Ази тивийн орнууд чансаагаараа дээгүүр байр эзэлдэг бөгөөд энэ жил Сингапураас гадна Хятадын Макао, Тайвань, Япон, Өмнөд Солонгос зэрэг улс өндөр амжилт үзүүлсэн байна. Харин Эстони дахин Европын орнуудаас нэгдүгээрт эрэмбэлэгдэв.
Эдгээр улс орон бүгд гурван ангилал тус бүрээр дэлхийд эхний аравт багтжээ.
PISA гэдэг нь Олон улсын сурагчдын үнэлгээний хөтөлбөр гэсэн үгийн товчлол юм. Энэхүү судалгааг Эдийн засгийн хамтын ажиллагаа, хөгжлийн байгууллага (OECD) 2000 оноос хойш хийж байна.
Орос улс энэ судалгаанд анх удаа оролцсонгүй. 2018 онд хийсэн өмнөх PISA судалгаагаар Орос улс 31-р байрт орсон. Тухайн үед 79 орон хөтөлбөрт хамрагдаж байв.
Судалгаанд хамрагдсан улс орнуудын бүх хичээлийн ерөнхий үр дүн сүүлийн жилүүдэд муудсаныг судалгааны зохиогчид тэмдэглэжээ.
Хичээл тус бүр дээр ямар улс тэргүүлснийг дурдвал:
Унших чадвар
Унших оноогоор Сингапурын дараа эхний аравт Ирланд, Япон, Өмнөд Солонгос, Тайвань, Эстони, Макао, Канад, АНУ, Шинэ Зеланд орсон байна.
Их Британи 2018 оныхоос нэг байраар ахиж, 13-р байранд оржээ. Европын ихэнх орнууд дундаж байранд бичигджээ. Латви 27-д, Литва 32-т бичигджээ. Чили улс 37-р байрт орж, Латин Америкийн орнуудаас хамгийн өндөр үр дүнг үзүүлэв.
Унших чадвараар үнэлгээ хийгдсэн 81 орноос Марокко, Узбекистан, Камбож улс сүүл мушгисан байна.
Математик
Математикийн чансааны хүснэгтийн хувьд Сингапурын дараа Макао хоёрдугаарт орлоо. Тэдгээрийн араас нь эхний аравт Тайвань, Хонконг, Япон, Өмнөд Солонгос, Эстони, Швейцарь, Канад, Шинэ Зеланд улс эрэмбэлэгдсэн байна.
Дараагийн арван байр буюу 10-аас 20 хүртэлх байрыг Европын орнууд эзэлжээ. Их Британи 14-р байранд орсон бол Латви, Литва улс 21, 24-т тус тус оржээ.
Харин АНУ математикийн чиглэлээр 34-т жагсав.
Байгалийн шинжлэх ухаан
Энэ ангилалд Сингапурын дараа хоёроос аравдугаар байрт Япон, Макао, Тайвань, Өмнөд Солонгос, Эстони, Хонконг, Канад, Финлянд, Австрали улс орсон байна.
15, 16-р байранд Их Британи, АНУ оржээ. Европын ихэнх орнууд дундаж байр сууриндаа хэвээр үлджээ. Латви 19-р байранд, Литва 29-д орсон байна.
Эх сурвалж: ВВС
