
Кубын удирдагч асан Фидель, Рауль Кастро нарын төрсөн дүү Хуанита Майамид 90 насандаа таалал төгсчээ. Хуанита Кастро 60-аад оны дунд үеэс АНУ-д амьдарч, ах нараа түлхэн унагаж, Кубын дэглэмийг өөрчлөхийн төлөө тэмцэж байжээ.
"Өнөөдөр хайрт Куба улсынхаа төлөө цуцашгүй тэмцэгч, онцгой эмэгтэй Хуанита Кастро таалал төгсөв" гэж Кастрогийн намтар номын хамтран зохиогч Мария Антониета Коллинз инстаграмдаа бичжээ.
Хуанита Кастро 1959 оны Кубын хувьсгалын дараа ах нартайгаа зөрчилдсөний улмаас ээжийгээ нас барснаас жилийн дараа буюу 1964 онд Кубыг орхин явсан юм. Тэрээр Майамид суурьшиж, 2007 он хүртэл эмийн сан удирдаж байв.
Хуанита Кастро Кубын дэглэмийг эсэргүүцэгчдэд идэвхтэй тусалж, Тагнуулын Төв Газартай хүртэл хамтран ажиллаж байжээ.
Ах нар нь ардчиллын зарчмаас урвасан, мөн улс төрийн өрсөлдөгчөө хөнөөсөн учраас тэр ах нартаа урам хугарах болсон гэж дурсамждаа дурссан байдаг. Хувьсгалын дараа тэрээр 1964 он хүртэл Кубын тэрс үзэлтнүүдэд тусалж, нуугдаж байсан бөгөөд эцэст нь өөрөө арлыг орхин явсан юм.
Фидель, Рауль Кастро нар 1996 онд
"Фидель, Раул, миний ах нар, нууц түүх" гэсэн гарчигтай дурсамж номондоо Кастро Фиделийг засгийн эрхэнд ирсэн 1959 оны хувьсгалаас хойш хоёр жилийн дараа тэрбээр Гавана дахь ТТГ-т элссэн гэж мэдэгджээ.
Тэрээр Донна хэмээх нууц нэрээр Кубын Засгийн газрыг түлхэн унагахын тулд АНУ-д нууцын зэрэглэлтэй мэдээлэл цуглуулахад гурван жил зарцуулсан байна. Хуанита Кастро дурсамж номондоо АНУ-д цагаачдын нийгэмлэгт өөрийн байр сууриа олж, Фидель, Раул нарын дүү, цөллөгт байгаа дэглэмийг эсэргүүцэгч гэсэн хоёр дүрийг хослуулах нь түүнд амаргүй байсан гэж бичжээ.
"Явсан бусад хүмүүсийнхээс илүү надад хэцүү байсан нь эргэлзээгүй. Миний амьдралын парадоксыг ойлгодог хүн цөөхөн” гэж тэр бичжээ. "Куба дахь хүмүүсийн хувьд би одоогийн дэглэмийг буруушааж, орхиж явсан учраас цөллөгдөгч юм. Харин Майамигийн олон хүмүүсийн хувьд би Фидель, Раул хоёрын эгч учраас "персона нон грата" юм. гэж байжээ.
Түүний том ах Фидель 2016 онд Гавана хотод 90 насандаа таалал төгссөн бөгөөд Хуанита оршуулах ёслолд очоогүй. Харин Рауль Кастро өдгөө 92 настай бөгөөд Кубад амьдарч байна.
Кубын хувьсгалын удирдагч Фидель Кастро Кубыг тавин жил шахам захирч, 2008 онд дүү Раулд эрх мэдлээ шилжүүлсэн. 2018 онд Рауль Кастро төр, засгийн тэргүүний албан тушаалаа орхиж, Кубын Коммунист намын дарга, ерөнхий командлагч хэвээр үлджээ.
Мөн 2021 онд тэрээр Кубын Коммунист Намын Төв Хорооны нэгдүгээр нарийн бичгийн даргын албан тушаалаасаа огцорч байгаагаа зарлав. Энэ нь сүүлийн 60 жилд анх удаа Кастрогийн гэр бүлийн төлөөлөл Кубад удирдах албан тушаалд үлдээгүй гэсэн үг байв.
Эх сурвалж: ВВС