Арабын Нэгдсэн Эмират Улсын Дубай хотноо Уур амьсгалын өөрчлөлтийн тухай НҮБ-ын суурь конвенцын Талуудын 28 дугаар бага хурал /COP28 – Conference of the Parties/ өнөөдөр эхэлсэн. Хуралд 140 гаруй орны 70 гаруй мянган хүн оролцож байна. Оролцогчдоос дэлхийн уур амьсгалын өөрчлөлтийн талаар байр суурийг нь тодрууллаа.
Винисиус Пиньейру Паррачо /Порто Сегуро хотын зөвлөлийн гишүүн, Бразил Улс/: Уур амьсгалын өөрчлөлтөд бүх нийтээрээ анхаарал хандуулах ёстой гэж би боддог. Талуудын 28 дугаар бага хурал бол өнөөгийн нөхцөл байдлыг өөрчилж, сайжруулах, дэлхийн дулаарлыг 1.5 хэмийн хязгаарт барих зэрэг асуудлыг улс төрийн өндөр түвшний оролцоотой, үр дүнтэй ярьж хэлэлцэх том боломж гэж бодож байна. Бразил улсад Амазоны ширэнгэн ой оршдог. Манай улсад уур амьсгалын өөрчлөлттэй холбоотой олон асуудал байна. Тийм ч учраас манай улс СОР28 хуралд онцгой ач холбогдол өгч, үүрэг хариуцлагаа ухамсарлаж, нийт 1400 гаруй төлөөлөгч энэ удаагийн хуралд оролцож байна. Үүгээрээ манай улс бусад улсад сайн жишээ болох болов уу гэж бодож байна. Бид бусад улс оронтой туршлага солилцох сонирхолтой байна.
Барбара К.Кангвана /COP28 хурлын Залуучуудын хөтөлбөрийн оролцогч, Кени Улс: Би Уур амьсгалын өөрчлөлтийн тухай НҮБ-ын суурь конвенцын Талуудын бага хуралд хоёр дахь удаагаа оролцож байна. Энэ удаагийн бага хуралд өмнөх хурлуудаар хэлэлцэж байсан зарим сэдэв шилжин ирсэн байна. Мэдээж өмнөх хурлуудаар зөв шийдвэр гарч байсан, улс орнууд үндэсний хөтөлбөрүүдээ хэрэгжүүлж эхэлсэн. Ямар үр дүн гарч байгааг энэ жил харна гэж найдаж байна. Түүнчлэн энэ жилийн хэлэлцэх сэдэвт хүнсний аюулгүй байдлын асуудал орж ирсэн. Энэ асуудлын талаар зүгээр нэг яриад өнгөрөх биш, бодит үр дүн гаргана гэдэгт өндөр найдлага тавьж байна. Өнөөдөр хүнсний аюулгүй байдлын асуудал маш чухлаар тавигдаж байна. Хоол, хүнсийг хүний үндсэн хэрэгцээ гэдгээр нь биш, бараа, бүтээгдэхүүн, мөнгө олох хэрэгсэл гэж хардаг тал бий. Энэ жилийн хурлаар хүнсний аюулгүй байдлын асуудалд бодитоор хандаж, энэ сэдэв урагшилна гэдэгт итгэж байна.
Бассем Камел /“Sky News Arabia” радиогийн сэтгүүлч, АНЭУ/: Уур амьсгалын өөрчлөлтийн талаарх олон улсын яриа хэлэлцээ АНЭУ-д болж буй Талуудын 28 дугаар бага хурал дээр үргэлжилж байна. Өнгөрсөн жилүүдэд улстөрчид хэрэгжихгүй маш олон амлалт өгсөн. Гэхдээ энэ жил умард, өмнөдийн ялгаа, баян, ядуу орнуудын ялгаатай байдлын талаар нэгдсэн ойлголцолд хүрч чадна гэсэн хүлээлт маш өндөр байна. Дэлхий даяар ядуурал нэмэгдэж, хүнсний хомсдол нүүрлээд байгаа энэ үед Талуудын 28 дугаар бага хурлаар хөгжиж буй, буурай орнуудын хүнсний асуудлыг хэлэлцэж байгаа нь маш зөв зүйл болж байна. Дэлхий даяар хүнсний аюулгүй байдлыг хангаж, хүн бүрд сайхан амьдрах боломж олгохын төлөө бүгдээрээ хамтран ажиллах ёстой гэж бодож байна.
Хива Нуи /Оюутан, Чили Улс/: Манай улс усаар хүрээлэгдсэн учраас уур амьсгалын өөрчлөлтийн асуудалд анхаарал хандуулж байдаг. Ялангуяа арлын орнуудад уур амьсгалын өөрчлөлтийн нөлөө, эрсдэл өндөр гэж бодож байна. Энэ хурлаас гарах шийдвэрүүд манай ард түмний амьдралд нөлөөлөх учраас би оюутан хүний хувиар бусдыгаа уриалах гэж 28 дугаар бага хуралд ирж оролцож байна. Уур амьсгалын өөрчлөлтийн асуудалд илүү олноороо анхаарч, энэ хурлаас зөв шийдвэрүүд гарна гэдэгт найдаж байна.
