УИХ-аар Засгийн газраас өргөн мэдүүлсэн Шүүх байгуулах тухай хуулийн төслийг хэлэлцэж буй. Уг хуулийн төслийн агуулга нь авлига, албан тушаалын гэмт хэргийг анхан шатны шүүхээр хэлэлцэхээ больж, давж заалдах болон хяналтын шатны шүүхээр хэлэлцдэг болох тухай юм. Цаашлаад авлигын дагнасан шүүхтэй болох зорилгоор уг хуулийн төслийг боловсруулжээ.
Шүүх байгуулах тухай хуулийн төслийг Хууль зүйн байнгын хорооны хуралдаанаар хэлэлцэх үеэр Улсын дээд шүүхийн шүүгч Д.Батцэрэн "Авлига, албан тушаалын гэмт хэрэг сүүлийн гурван жилд өсөлттэй байгаа. 2022 онд анхан шатны шүүх 417 хүнд холбогдох 182 авлига, албан тушаалын гэмт хэргийг хэлэлцсэн. Давж заалдах шатны шүүх 269 хүнд холбогдох 100 хэргийг шийдвэрлэсэн. Энэ нь 2021 оныхоос 3.5 дахин өссөн үзүүлэлт" гэлээ.
