Манай улс нийтийн тээвэртээ 2009 оноос хойш парк шинэчлэл хийгээгүй. Өнгөрсөн 2022 оны байдлаар нийт үйлчилгээнд явж байгаа автобусны 50 гаруй хувийнх нь насжилт хэтэрсэн гэж дүгнэсэн.
Стандартын дагуу бол 12-оос дээш жил явсан автобусыг ашиглахыг хориглосон байдаг ч эдгээр автобусыг 13 дахь жилдээ ашигласаар л байна.
Харин энэ онд нийтийн тээврийн парк шинэчлэл хийхээр автобус худалдан авсан ч “Ногоон автобус”-ны гэх хэрэг гарч, уг асуудлаар хууль хяналтын байгууллагаас 13 хүнийг мөрдөн шалгаж байгаа юм.
Харин өнгөрсөн сард дахин НЗДТГ-аас 183 тэрбумаар нийслэлийн нийтийн тээвэрт парк шинэчлэл хийх зорилгоор 600 автобус худалдан авах тендер зарлаад буй. Тендерийн хугацаа 2023 оны арваннэгдүгээр сарын 24-ний өдрийн 09:00 цагт дуусах юм.
