Өнөөдөр буюу арваннэгдүгээр сарын 13-ны өдөр Цагдаагийн ерөнхий газрын харьяа "Кибер гэмт хэрэгтэй тэмцэх төв"-ийг нээлээ.
Энэ үеэр ЦЕГ-ын дарга Т.Сүхболд " Цахим төрлийн гэмт хэргээс урьдчилан сэргийлэх бодлогын хүрээнд "Кибер гэмт хэрэгтэй тэмцэх төв"-ийг нээж байна.
ЦЕГ-ын харьяа Кибер гэмт хэрэгтэй тэмцэх төв нь 24 цагаар ажиллана.
Иргэд цахим гэмт хэргийн хохирогч боллоо гэж бодсон даруйдаа цагдаагийн 102 утас эсвэл "Кибер гэмт хэрэгтэй тэмцэх төв"-ийн цахим хуудаст хандан мэдэгдэх боломжтой. Ингэснээр цагдаагийн байгууллага прокурор, банкнуудтай хамтран иргэдийн мөнгийг шуурхай царцаах арга хэмжээ авах юм. Ингэснээр бид хохирлын хэмжээг 50 хувь хүртэл бууруулж чадна гэж тооцоолж байна." гэв.
Сүүлийн жилүүдэд цахим орчинд цахим залилан, халдлага, мөрийтэй тоглоом анхаарал татахуйц хэмжээнд өсөж, иргэдэд учирч буй хохирлын хэмжээ эрс нэмэгдэж байна. Тодруулбал сүүлийн таван жилийн хугацаанд залилангийн 14085 гэмт хэрэг үйлдэгдсэнээс 97 хувь цахим орчинд гарчээ.
