Улсын их хурлын нэгдсэн чуулганд хөгжлийн бэрхшээлтэй хүний эрхийг хангах чиглэлээр хэрэгжүүлж буй бодлого, арга хэмжээний талаар Хөдөлмөр, нийгмийн хамгааллын сайд Х.Булгантуяа мэдээлэл хийлээ.
Тэрээр, Монгол Улс 2008 онд НҮБ-ын Хөгжлийн бэрхшээлтэй хүний эрхийн тухай конвенцод нэгдэж, УИХ-аас 2016 онд Хөгжлийн бэрхшээлтэй хүний эрхийн тухай хуулийг баталснаар хөгжлийн бэрхшээлтэй иргэдийн нийгмийн оролцоог дэмжих, нийгмийн хамгааллыг сайжруулах, тэдний онцлог, чадварт нь тохирсон ажлын байраар хангах, үйлчилгээг сайжруулах чиглэлээр холбогдох салбаруудын эрх зүйн орчинг боловсронгуй болгох, хуулийн хэрэгжилтийг эрчимжүүлэх, төрийн үйлчилгээний хүртээмжийг нэмэгдүүлэх чиглэлээр цөөнгүй арга хэмжээг авч хэрэгжүүлж байна. Одоогоор Монгол Улсад нийт 115.1 мянган хөгжлийн бэрхшээлтэй хүн байгаагийн 40 хувь нь төрөлхийн, 60 хувь нь олдмол шалтгаантай байна. Мөн 0-18 насны 11.8 мянган хөгжлийн бэрхшээлтэй хүүхэд байна.
Тэгвэл 2022-2023 оны хичээлийн жилд нийт хөгжлийн бэрхшээлтэй нийт хүүхдийн 64 хувийг буюу 8228 суралцагчийг бүх шатны боловсролын үйлчилгээнд хамруулж байгаа. Боловсролын түвшнээр нь авч үзвэл, сургуулийн өмнөх боловсролд 1498, ерөнхий боловсролд 5673, мэргэжлийн боловсролд 643, дээд боловсролд 414 суралцагч суралцаж байна.
Түүнчлэн, сургуулийн өмнөх болон ерөнхий боловсролын чиглэлээр Боловсрол шинжлэх ухааны яамнаас тэгш хамран сургах боловсролын чиглэлээр Жайка олон улсын байгууллагын Тусгай хэрэгцээт боловсрол шаардлагатай хүүхдэд үзүүлэх эрүүл мэнд, боловсрол, нийгмийн хамгааллын үйлчилгээг сайжруулах”, АХБ-ны буцалтгүй тусламжаар хэрэгжиж буй “Тэгш хамруулах боловсролыг дэмжих”, Дэлхийн боловсролын түншлэл” олон улсын байгууллагын санхүүжилтээр “Тэгш боломжийг бүрдүүлэх замаар суралцахуйг дэмжих төслүүдийг хэрэгжүүлж буй. Эдгээр төслийн хүрээнд нийт 3.0 тэрбум орчим төгрөгийн санхүүжилтээр 26 сургалтын байгууллагын хүртээмжтэй орчинг сайжруулж, хүүхэд хөгжлийн танхимыг шинээр тохижуулаад байна.
Мөн хөгжлийн бэршээлтэй хүүхэд суралцдаг хоёр цэцэрлэг, зургаан сургуульд улсын төсвөөр 800.0 сая төгрөгийн санхүүжилтээр тохирох хэрэглэгдэхүүн нэмэгдүүлэх, хүртээмжтэй орчин сайжрууллаа. 21 аймаг есөн дүүргийн боловсролд хамрагдалтыг дэмжих зөвлөл, БШУГ-ын холбогдох мэргэжилтэн, 2900 багш ажилтан, эцэг эхэд чиглэсэн сургалт нөлөөллийн үйл ажиллагаа зохион байгуулсан. Үүнээс гадна Монголын хараагүйчүүдийн үндэсний төвийн дэргэдэх Мэргэжлийн сургалт, үйлдвэрлэлийн төвд хөгжлийн бэрхшээлтэй хүүхдийг тэгш хамруулан сургах зорилгоор 250.0 сая төгрөгийн санхүүгийн дэмжлэг үзүүлснээс гадна Засгийн газрын тогтоолоор “Дээд боловсролын сургалтын байгууллагын суралцагчид төрөөс санхүүгийн дэмжлэг үзүүлэх журам”-ын дагуу суралцагчдад төрөөс үзүүлэх санхүүгийн дэмжлэгийг 2023 оны эхний хагас жилд дараах байдлаар олгосон. Үүнд:
-Хөгжлийн бэрхшээлтэй бакалавр, магистр, докторын хөтөлбөрт сурч байгаа 473 суралцагчид 843,1 сая төгрөг;
-Бакалаврын хөтөлбөрт суралцаж байгаа эцэг, эх нь хоёулаа хөгжлийн бэрхшээлтэй 282 суралцагчид 544,4 сая төгрөг;
-Бакалаврын хөтөлбөрт суралцаж байгаа хөдөлмөрийн чадвараа бүрэн алдсан гишүүнтэй өрхийн 1382 суралцагчид 2,6 тэрбум төгрөг;
-Төрийн өмчийн их, дээд сургуульд хөдөлгөөн засалч, хөдөлмөр засалч мэргэжлээр суралцаж байгаа 73 суралцагчид 99,9 сая төгрөгийн санхүүгийн дэмжлэг тус тус олгоод байна гэлээ.
