Дорноговь аймгийн Сайншанд сумаас өнгөрсөн сарын 3-нд 12 настай охин сураггүй болж, улмаар гурав хоногийн дараа цогцсыг нь эрлийнхэн хээрээс олсон билээ.
Тодруулбал, эрлийн багийнхан 12 настай охины цогцсыг Дорноговь аймгийн Мандах, Өмнөговь аймгийн Манлай сумын чиглэлээс олсон байдаг. Харин хэргийг үйлдсэн хамаастан байж болзошгүй хоёр хүнийг цагдан хорьж, мөрдөх байгууллагаас шалгаж байгаа билээ.
Тэгвэл талийгаач охины шүүх шинжилгээний дүгнэлт эцэслэн гараагүй байгаа талаар өмгөөлөгч нь ярьж байна.
Тэрбээр "Шүүх шинжилгээний дүгнэлт эцэслэн гараагүй байна. Гарах хугацаа 14-21 хоног байдаг. Шинжилгээний хариу гарсны дараа ар гэрийнхэн нь болон өмгөөлөгч нь олон нийтэд хандаж мэдээлэл хийнэ. Гадуур гараад байгаа янз бүрийн мэдээлэлд тайлбар хийнэ. Тэр болтол ямар нэгэн мэдээлэл өгөхгүй. Эхлээд шинжээчдийн дүгнэлт бүрэн гараадах" гэлээ.
Тухайн хэрэгт холбогдуулан Бадамхатан гэгч этгээдийг Нийслэлд цагдан хорьсон байгаа бөгөөд түүнийг талийгаач охины ээжтэй хамааралтай гэсэн мэдээллийг ар гэрийнхэн нь болон өмгөөлөгч нь үгүйсгэж байгаа юм. Эх сурвалжийн хэлж буйгаар ямар ч хамааралгүй. Танихгүй, гадуур тийм мэдээлэл яваад байгаа гэв.
Талийгаач охин айлын ганц хүүхэд байсан бөгөөд ээж нь тэтгэврийн насны эмэгтэй ажээ.
