Нийслэлийн онцгой байдлын газраас гал түймрийн нөхцөл байдал болоод ард иргэдэд анхааруулга сэрэмжлүүлэг өглөө.
Нийслэлийн Онцгой байдлын газрын Тэргүүн дэд дарга, хурандаа Д.Мөнхсайхан “Сүүлийн өдрүүдэд ахуйн гал түймрийн дуудлага, хор хохирол нэмэгдэж, хүн амь насаа алдаж байна. Нийслэлийн нутаг дэвсгэрт энэ оны эхний 10 сарын байдлаар 1400 гаруй гамшиг ослын дуудлага ирсний 1300 нь гал түймрийн дуудлага байна. Үүн дунд ахуйн гал түймрийн дуудлага дийлэнх хувийг эзэлж байгаа. Голлох шалтгаан нь цахилгааны аюулгүй байдал хангаагүйгээс, бага насны хүүхдээ хараа хяналтгүй цоожилж орхих, үнс нурмаа ил задгай асгах зэргээс үүсдэг.
Бид өнгөрсөн 7 хоногт Баянзүрх дүүргийн 20 гаруй мянган айл өрхүүдэд хяналт, шалгалт хийж, 6 мянга гаруй зөрчил, дутагдлыг илрүүлж, хэрхэн аюулгүй байх тухай заавар, зөвлөгөө өгч ажиллалаа.
Мөн Хан-Уул дүүргийн айл өрхүүдэд үзлэг шалгалт хийгээд явж байна. Өнгөрсөн долоо хоногт БЗД-т гал түймрийн улмаас хоёр иргэн амь насаа алдсан. Өнгөрсөн шөнө 7 хүн амь насаа алдсан харамсалтай хэрэг гарлаа.
Бид танд ийм эрсдэл байна, үүнийг аюулгүй болго, үгүй бол танд ийм аюул үүснэ гээд хэлж ярьж, анхааруулж байгаа. Ард, иргэд ахуйн гал, түймрээс сэрэмжилж бидний гаргаж буй зөвлөгөөг амьдрал, ахуйдаа хэрэгжүүлээч гэж хүсмээр байна. Гал түймэр гэнэт гардаггүй, хэн нэгний санамсар, болгоомжгүй үйлдлээс л гардаг.
Өнгөрсөн шөнө нийслэлийн СХД-ийн 3 дугаар хороонд гал түймэр гарсан. Гал хүмүүсийг бөх унтаж байх үед буюу шөнийн 03:00 цагийн үед гарсан. Галыг бүрэн унтраахаар онцгой байдлын албан хаагчид 02:30 цаг ажиллалаа. Мансарттай залгаа гарааштай хоёр давхар байшин байсан. Залгаа 7х7 хэмжээтэй байшин руу гал орсон ч алба хаагчид галын унтраасан. Гал түймрээс таван иргэн эсэн мэнд гарсан ч, 7 иргэн харамсалтайгаар амь насаа алдсан. Хэргийн газрын үзлэгт цагдаагийн байгууллага ажиллаж байгаа. Гал юунаас болж, яагаад гарсан гэдэгт хариулах боломжгүй банйа. Цагдаагийн байгууллагаас үзлэг шалгалт хийгдэж байгаа” гэлээ.
