Коронавируст халдвар /КОВИД-19/-ын цар тахлын онцгой байдлын үед Засгийн газраас авч хэрэгжүүлсэн төлөвлөгөө, төсөл хөтөлбөрүүдийн санхүүгийн зарцуулалт, гадаадын орнуудаас авсан зээл, тусламж, иргэн, аж ахуйн нэгжүүдийн хандив, тусламж болон тэдгээрийн орлого, зарлагыг нийтэд ил болгох тухай асуудлаарх Ерөнхий хяналтын сонсголыг өнөөдөр зохион байгуулахаар товлосон боловч хойшиллоо.
УИХ дахь Ардчилсан намын бүлгийн дарга О.Цогтгэрэл “Ковидын асуудал чинь зөвхөн санхүүгийн зарцуулалт биш. Ковидын үеийн хүний эрхийн зөрчил, мэдээллийн хаалттай нээлттэй байдал гэх мэт зургаан бүлэг асуудлын хүрээнд ярилцахаар аравдугаар сарын 23,24-ний өдрийг тавьсан. Долдугаар сараас хойш энэ асуудлыг судалж, зохион байгууалт хийх явцад 10 их наядаар хязгаарлагдахгүй, том мөнгөн дүнгүүд яригдсан учраас Ж.Батсуурь, ЛОюунчимэг, Г.Тэмүүлэн, А.Баттөмөр нарын 5 гишүүний бүрэлдэхүүнтэй ажлын хэсгээс хуралдаад шинжээч томиллуулъя гээд харьяалах байнгын хороонд ханд гэсэн. Тиймээс бид УИХ дахь ЭЗБХ-нд хандаад 14 хоног 3 шинжээч ажиллуулах шаардлага тавьсан. Гэтэл ирц хүрээгүй гэдэг шалтгаанаар шинжээч томилж өгөөгүй. Сонсголыг чанартай явуулж, бодит мэдээлэл дээр ажиллахын тулд сонсголыг тодорхой хугацаагаар хойшлуулж өгөөч гэсэн хүсэлтийг өнгөрсөн долоо хоногт ЭЗБХ-нд тавьсан. Гэтэл хуулийн маргаантай байдлаас үүдэж, энэ сонсголыг зохион байгуулах боломжгүй болоод байна. Үнэндээ Хөгжлийн банкны гэх 1 их наяд төгрөгийн асуудал дээр өндөр ач холбогдол өгч, олон арван шинжээчийг бүтэн жил ажиллуулсан хэрнээ 20 их наядын мөнгөн дүн дээр шинжээчгүй асуудлыг ярих нөхцөл байдал үүсээд байгаа юм. Бидэнд өнөөдөр төрийн байгууллага болон иргэдээс ирсэн мэдээлэл байгаа ч бид шууд дүгнэлт хийх боломжгүй учраас шинжээч хүсээд байгаа юм.
Тухайлбал, иргэдээс 63 тэрбум төгрөгийг эрүүл мэндийн хамгаалах хэрэгсэл авсан. Эдгээрээс 50 хувь нь ковидын дэглэм өөрчлөгдөөд, хамгаалах хэрэгсэл ямар ч хэрэгцээ шаардлагагүй болсон нөхцөлд худалдан авалт хийсэн зүйлс байна. Мөн цус шингэлэх бүтээгдэхүүн 10 тэрбум төгрөгөөр авсан ч маш цөөнийг нь ашигласан гэдэг мэдээлэл бий. Тиймээс үүнийг шинжээчийн дүгнэлтээр ямар бодлогын алдаа хаана гарав гэдгийг тодорхой болгох шаардлагатай.
Мөн тодорхой албан тушаалтнууд тэрбумаас дээш төгрөгийн байр худалдаж авсан гэх мэт мэдээлэл ч ирсэн. Ийм асуудлууд байгаа учраас л шинжээч хүсээд байгаа юм“ гэлээ.
УИХ-ын гишүүн, ЭМ-ийн сайд С.Чинзориг “Ажлын хэсгээс сонсголыг хойшлуулж байгаа юм байна гэж ойлголоо. Сонсголыг илүү ажил хэрэгч байдлаар явуулаасай. Улстөржсөн асуудал болгомооргүй байна.Хуулийнхаа хүрээнд сонсгол даргалагч өөрөө шинжээчээр томилуулах хүсэлтэй хүмүүсдээ мэдэгдлээ хүргүүлэх ёстой” гэв.
УИХ-ын гишүүн Н.Ганибал “ УИХ, гишүүдийн үндсэн зорилго нь мэдээллийг олон нийтэд нээлттэй хүргэх ёстой. Тиймээс шинжээчээ томилуулаад нээлттэй сонсголыг зохион байгуулах нь зөв. Яамдаас ирж байгаа мэдээллээс харвал хэтэрхий ерөнхий байна. Бодит мэдээллээ ирүүлэхгүй байна” хэмээн саналаа хэлэв.
Мөн УИХ-ын дэд дарга С.Одонтуяа “Нэг хүнийг эмчлэхэд 8 сая төгрөг зарцуулсан гэж байгаа. Яг ямар эмчилгээ хийсэн болоод нэг хүнд 8 сая төгрөг зарцуулав гэдгийг олон нийт мэдэх эрхтэй” гэлээ.
