
Хамас исламист байгууллага барьцаанд байсан АНУ-ын иргэд болох ээж, охин хоёрыг сулласан тухай Израилийн ерөнхий сайдын хэвлэлийн алба Баасан гарагт мэдээлжээ.
Эх Жюдит Раанан, охин Натали Раанан нар одоогоос бараг хоёр долоо хоногийн өмнө Газын зурвасын хилийн ойролцоох Израилийн тосгоноос барьцаалагдаж байсан юм.
АНУ-ын хэвлэлүүдийн мэдээлснээр тэд Чикаго хотын дагуул хот Эванстоны оршин суугчид ажээ.
Аравдугаар сарын 7-ны өдөр Хамасын дайчид Израилийн нутаг дэвсгэрт гэнэдүүлэн халдах үеэр энгийн иргэн голдуу 1,400 орчим хүн алагдаж, 200 орчим хүн барьцаалагдсан юм.
Барьцаалагдсан хүмүүсээс эхний хоёр нь ийнхүү суллагдаж байна.
Хамасын зэвсэгт хүчний хэвлэлийн төлөөлөгч Абу Убайда өчигдөр гаргасан мэдэгдэлдээ барьцааны хүмүүсийг Катарын засгийн газрын зуучлалаар сулласныг хэлжээ.
“Хүмүүнлэгийн шалтгаанаар, бас Байден болон түүний фашист засаг захиргаа худлаа ярьж буйг Америкийн ард түмэн, дэлхий нийтэд батлан харуулахын тулд” гэж тэр ээж, охин хоёрыг сулласан үндэслэлээ тайлбарласан байна.
Энэ үйл явдлын өмнөхөн Израилийн арми барьцааны ихэнх хүмүүс амьд мэнд байгаа тухай мэдээлсэн юм.
Израилийн зэвсэгт хүчин одоо 2.3 сая хүн амтай Газын зурвасыг бүслэн хааж, Хамас зэвсэгт байгууллагыг үндсээр нь устгах зорилго тавиад байгаа.
Ингэж бүслэхдээ хил хязгаарыг нь битүүмжилж, хоол хүнс, ундны ус, түлш шатахуун, эрчим хүчний нийлүүлэлтийг бүрэн таслаад байна.
Саяхан Египетийн хилийн боомтоор Газын зурваст хязгаарлагдмал хэмжээтэй хүмүүнлэгийн тусламж нэвтрүүлэхийг Израилийн эрх баригчид зөвшөөрсөн юм.
Баасан гарагт НҮБ-ын ерөнхий нарийн бичгийн дарга Египет-Газын хилийн боомтод биеэр очиж, нөхцөл байдалтай танилцжээ.
Сүүлийн байдлаар Газын зурваст Израилийн армийн явуулж буй агаарын довтолгооны улмаас 4,137 хүн амиа алдаж, 13,000 орчим хүн шархадсан тухай Палестины албаны эх сурвалж мэдээлсэн байна.
Бөмбөгдөлтийн улмаас нэг сая гаруй хүн орон гэргүй болсныг НҮБ мэдээлжээ.
Эх сурвалж: Reuters