УИХ-ын баасан гарагийн нэгдсэн чуулганаар /2023.10.20/ Хүүхэд хамгааллын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж, УИХ-ын гишүүд холбогдох албаныхнаас мэдээлэл авлаа.
НХХ-ийн сайд Х.Булгантуяа:
-Хүүхэд хамгааллын тухай хууль 2016 анх батлагдсан. Тухайн үед энэ хуулийг бүрэн хэрэгжүүлэхэд 11 тэрбум төгрөг жил бүр төсөвлөх шаардлагатай гэж үзэж байсан боловч 300 гаруй сая төгрөгтэй анх эхэлсэн байгаа юм. 2020 онд НҮБ-ын Хүүхдийн сангаас хуульд хийсэн үнэлэлт дүгнэлтээр кейс дээр ажилладаг санхүү, төсөв бага гэж гарсан. Тиймээс одоогийн бүтэц бүрэлдэхүүнээр ажиллахад кейс дээр ажиллах шаардлагатай гэж үзсэн төсвөө тооцож, 14 тэрбум төгрөг тавьсан. 330 сум, хороод дээр ажиллах боловсон хүчинтэй холбоотой зардал үүн дээр нэмэгдэж орж ирнэ.
-НХХЯ-ны дэд сайд С.Зулпхар:
-Хүүхэд хамгааллын тогтолцоо нь мэргэшсэн байхаар хуулинд зарчмыг нь тодорхойлсон. Мэргэшсэн байх зарчим, үүнтэй уялдсан тогтолцооны гол бүрэлдэхүүн хэсэг нь хүүхэд гэр бүлийн асуудал хариуцсан нийгмийн ажилтан байгаа юм. Нийгмийн ажилтан хамтарсан багийг гол арга зүйгээр хангах, дэмжлэг үзүүлэх үүрэгтэй. Мөн энэ ажлыг удирдан зохион байгуулах бүхий л уялдааг хангахаар хуульд маш тодорхой оруулж өгсөн. Хүүхдийн эрхийн байцаагч бол нийгмийн ажилтнаас ялгаатай. Хүүхдийн эрхийн зөрчил дээр ажилладаг. Тусдаа чиг үүрэг бүхий субъект.
