АТГ-аас урьд шөнө буюу аравдугаар сарын 16-17-нд шилжих шөнө нийслэлийн нэр бүхий албан тушаалтнуудыг хойшлуулшгүй ажиллагаа явуулж, баривчилжээ.
Тодруулбал, Улаанбаатар хотын ерөнхий архитектор Ц.Тулга, Хот байгуулалт, хөгжлийн газрын ажилтан Т.Эрдэнэтуяа, Б.Уранчимэг нарыг Эрүүгийн хуулийн 22.1 /Эрх мэдэл албан тушаалын байдлаа урвуулан ашиглах/, 22.4.2 /Нийтийн албан тушаалтан хахууль авах/ гэмт хэрэгт сэжигтнээр тооцон хойшлуулшгүйгээр 48 цагийн хугацаатай Цагдан хорих 461 дүгээр ангид цагдан хорьсон байна.
Ерөнхий сайд Л.Оюун-Эрдэнэ өнгөрсөн наймдугаар сард АТГ-ын дарга болон Ерөнхий прокурорт хандан, голын ай сав болон нийтийн эзэмшлийн талбайд ямар албан тушаалтнууд, хэнд газар олгосон бэ гэдгийг нэг бүрчлэн ангилж, хууль бус аргаар газар олгосон албан тушаалтнуудыг зарлаж шалгах хүсэлтийг тавьж байсан. Ямартай ч АТГ нийслэл Улаанбаатар хотод хууль бус газар олголт болон зарим худалдан авалттай холбоотой хууль бус хэргүүд дээр ажиллаж буй аж.
